Jowai, Nailar 29
Shi bynta ban rakhe ïa ka National Sports Day, ka bor pynïaid District jong ka West Jaiñtia Hills ryngkat ka jingïatreilang bad ka shlem trerikam u District Sports Officer (DSO), West Jaiñtia Hills ki la pynlong da ki jingïakop ïalehkai ba la tip kum ka ‘Inter School Competition Indigenous Game da ka Dat Moopoin bad Ïatan Tyllai.
Ha kane ka jingïakop la shim bynta da ki khynnah skul shynrang bad kynthei ha ka jingïalehkai kaba la pynlong madan Kiang Nangbah Stadium, Jowai ha ka sngi Palei.
Ha kane ka jingïakop ïalehkai tynrai, la shim bynta da ki 6 tylli ki skul kynthup ka Kiang Nangbah Govt. Higher Secondary School, Marian Hill Higher Secondary School, Mihmyntdu RC. Secondary School, HK. Singh Memorial Secon -dary School, Jaiñtia Secondary School bad QC Springside Higher Secondary School.
Ki skul kiba la poi sha ka thong jong ka jingjop ha ka jingïakop ïalehkai Dat Mawpoin ha ka liang ki khynnah kynthei ki long ka HK. Singh Memorial Secondary School, Kiang Nangbah Government Higher Secondary School bad ka QC Springside Higher Secondary School.
Katba ha ka liang ki shynrang ki long ka Mihmyntdu RC Secondary School, Marian Higher Secondary School bad ka Jaiñtia Higher Secondary School.
Ha ka jingïakop tan tyllai ne Tug of War ha ka liang ki kynthei la rah da ka H.K Singh Higher Secondary School, ba-ar ka Jaiñtia Higher Secondary bad balai ka Marian Higher Secondary School.
Katba ha ka liang ki shynrang la ïoh da ka Jaiñtia Higher Secondary School, ba-ar ka Kiang Nangbah Government Higher Secondary School bad balai ka Marian Hills Higher Secondary School.
Ha kane ka sngi la sam ïa ki khusnam sha baroh ki nongjop ha ka jingdonlang u District Sports Officer (DSO) u Bah Khroobok Passah ki dkhot ka WJDSA ba kynthup ïa u bah Patrick Lamare, bah Nangebor-mi Suting nalor kiwei pat.
