Shillong, Nailar 29
U Bah Ardent M Basaïawmoit, uba dei u President ka Voice of the People Party (VPP), bad MLA ka Nongkrem u la ther tyngeh ïa ki katto katne ki MLA na kiwei ki seng saiñpyrthei kiba dang don por ban kren dait bad kynnoh sniew pyrshah ïa ka seng.
U Bah Ardent u la ther ïa ki katto katne ki MLA ha ka por ba u la wanrah ïa ka ‘Call Attention’ hapoh ka Ïingdorbar Thawaiñ halor ka mat ïakren halor ka Meghalaya Public Service Commission (MPSC), ha kaba u la ong ruh ba ka VPP haba ka kren bad wanrah ïa kane ka mat kam dei satia ban pynbiej lane ïalam bakla ïa ki nongwad kam kumba la mut sniew da ki katto katne ki MLA.
Ha kane ka sngi, u Bah Ardent haba kyntu ban sangehïa ki kam kynnoh sniew pyrshah ïa ka VPP, u la ong “Kane ka dei ka khubor kaba jam bad ba shai pyrshah ïa ki, kiba ju mut sniew pyrshah ïa ka VPP”.
U Bah Ardent u la ong ka VPP kam ju leh ïa kum kane ka kam saiñpyrthei, hynrei ki don pat ki MLA kiba la shu pynleit jingmut tang sha ka VPP wat hadien ba ki la shah rem noh ha ka ilekshon MP kaba dang shu dep.
“Nga sngew thamula ba katto katne na ki MLA kiba la shu pynleit jingmut tang sha ka VPP. Nga sngew ba ki dei ban pdiang ïa ka jingshah rem ha ka ilekshon MP bad ïa ka rai u paidbah. Ka jingïai mut sniew jong ki ïa ngi ka dei ka jingkheiñ poh ïa ka jingstad u paidbah uba la jied ïa u kyrtong ka VPP,” la ong u Bah Ardent.
Ha kajuh ka por une u nongïalam ka VPP u la ong, u MP uba jop na ka seng VPP um dei satia tang u MP ka VPP, hynrei u la dei u MP ba mihkhmat ïa ka Shillong Konstitwensi bad kumta dei ban ïa klet noh ïa ka ilekshon bad ïatreilang na ka bynta ban buddien bad wanrah ïa ki kam pynroi.
