Khliehriat, Nailar 29
Kum shibynta ban rakhe ïa ka National Sports Day, ka shlem treikam jong ka District Sports Officer, East Jaiñtia Hills District ryngkat ka jingïatreilang bad ka shlem u Deputy Commissioner ha ka sngi Palei ka la pynlong da ka jingïakop mareh kaba 8 kilomiter kaba tip kum ka ‘Open Marathon’ na ka bynta ki nongshong shnong jong ka East Jaiñtia Hills District.
Ïa ka lama la kaweh da u Deputy Superintendent of Police ka East Jaiñtia Hills District, Khliehriat Bah S. Paslein ha ka jingdon lang ka District Sports Officer ka East Jaiñtia Hills District ka Kong S.M Rapsang nalor kiwei kiwei.
Ha kane ka jingïakop mareh na ka liang ki shynrang la rah da u Knerlang Phawa uba la wan ba nyngkong, ba-ar u Rishan Meki Ryngkhlem bad balai u Sting Phawa. Katba ha ka liang ki kynthei la lah da ka Phyrnai Kyndait, ba ar ka Rosy Sana bad ba lai ka Lamsuk Phawa.
Ki nongjop ha kane ka jingïakop ki la ïohrah da ki khusnam pisa kiba T. 7000, T. 5000 bad T. 3000.
Hadien kane, la pynlong ïa ka jingïalehkai ‘Exhibition Volleyball’ hapdeng ka East Jaiñtia Hills pyrshah ïa ka kynhun Deinchynrum ha madan ïalehkai Deinchynrum bad ïa ki khusnam la sam sam sha ki nongjop da ka Additional Deputy Commissioner, East Jaiñtia Hills District, Kong J.U Kharpuri.
Lah ban kdew ba ka National Sports Day la ju rakhe man la u snem ha ka 29 tarik Nailar kum ka dak jong ka jingïasnohktilang bad ka Ri India na ka bynta ban kynmnaw burom ïa u khlur ïalehkai hockey jong ka ri u Major Dhyan Chand.
