Shillong, Nailar 29
Hashwa ba ka kynhun ki rangïalehkai Under-17 kin mih na ka nongbah ban leit sha ka nongbah Delhi, ka skul Mynken Christian HSS kaba na Bhoirymbong ha ka sngi Palei ka la ai ka jingkyrkhu kyrdon ryngkat ki kyntien kitbok kitrwiang ïa ki khynnah ïalehkai ki ban leit ïashim bynta ha ka lympung ïalehkai 63rd International Subroto Cup 2024.
Kane ka la wan hadien ba ka tnat ïalehkai jong ka Sorkar Jylla ka la pynlong ïa ka jingïalang kaba kyrpang ha ka sngi Palei na ka bynta ban ai ka jingkitbok ïa kane ka kynhun.
Ha kane ka sngi la ïadon lang u Principal jong ka skul u Bah Everlasting Pyngrope, ki kynhun Seng Bhalang, ki nonghikai lem bad ki khynnah skul.
Haba ai jingkren ha kane ka sngi u Principal jong ka skul u Bah Everlasting u la pynpaw ka jingsngewkmen ba ka skul Mynken Christian ka la ïoh ban mihkhmat biang ïa ka Jylla ha ka kyrdan ïalehkai Under-17 ki shynrang sha Subroto Cup ka ban long ha ka nongbah Delhi.
Ha kajuh ka por u la ai jingïaroh halor ka jinglah ka skul jong ka Nongjri Presbyterian SS kaba la lah ban rah ïa ka nam lahduh ha ka kyrdan ïalehkai Under-15. “Te kumta ngi don jingkyrmen ba ka skul jong ka Mynken ruh kan lah ban ïalehkai bha ha katei ka lympung bad ngi khmih lynti lyngba ki jingïalehkai bha jong ki khynnah ngin sa lah ban rah ïa ka nam lahduh ha kane ka lympung.”
