Shillong, Nailar 29
Ka jingïoh bat jong ki pulit ka Umkiang, East Jaiñtia Hills ïa uwei u nong Bangladesh ka la pynpaw pyrthei ba une u mynder ri u la don bad Aadhaar, EPIC, PAN Card, kiba dei ki kot ba dei hok ban ïoh tang ki nongshong shnong ka Ri India, bad ïa kine ki kot, la kynnoh ba u la ïoh na Silchar, Assam.
Katkum ka khubor ba la ïohlum na ki pulit ha ka Sngi Palei, la ong ba ki pulit ka Umkiang ki la ujor ba ha ka 27 tarik Nailar ha ka por kumba 11 baje mynstep, ki la ïoh bat ïa uwei u nong Bangladesh ïa uba la tip kyrteng kum u Md. Khaled Hussain katba u dang ïaid ha ka thaiñ Kuliang.
Hadien ba ki la peit bniah ïa u, ki pulit ki la lap pynban ba u la don bad EPIC, Aadhaar bad PAN Card. Ha ka jingtohkit, ki pulit ki la ïoh jingtip ba utei u briew u la rung be-aiñ sha India lyngba ka Kuliang da ka jingthmu ban leit sha Silchar, Assam.
La ong ruh ba utei u mynder ri u la ïoh ïa kitei ki kot donkam na uwei u briew bym lah ban ithuh na Silchar, Assam.
