Shillong, Nailar 29
The lympung ïalehkai 30th Inter School and 12th Inter College Karate Tournament ba la pynlong da ka All Meghalaya Karate-Do Association, ka la poi sha kaba kut ha ka sngi Saitjaiñ ha Indoor Hall jong ka Sports Authority of India kaba ha NEHU.
Ka St Anthony’s Higher Secon-dary School ka la lah ban bat biang ïa ka nam lahduh ha ka liang ki khynnah shynrang, katba ka Sacred Heart Girls Higher Secondary School ka la long ka nam lahduh ha ka liang ki khynnah kynthei. Ka Shillong College ka la khur ïa ka nam lahduh ha ka liang ki kolej.
Ha kane ka lympung ïalehkai mynta u snem ki la don haduh 609 ngut ki nongïalehkai karate kiba la wan ïashim bynta bad kane ka la tam kumba 100 ngut na u snem 2023. Ïa ki nongïashim bynta la jied na ki 95 tylli ki skul bapher bapher bad hynriew tylli ki kolej hapoh ka Jylla.
Ka kyrdan jong ka jingïakop ka long kaba heh bha bad la ïohi ïa ki katto katne ki nongïalehkai karate kiba long shisha kiba tbit ha ka rukom ïalehkai bad la khmih lynti ba kin nangbteng ban ïai tyngshaiñ ha ka kam ïalehkai.
Ka jingïalehkai kaba itynnad bha ka dei na ki khynnah jong ka Sacred Heart Girls, Sunrays bad Synod HSS, ki bym ju don napdeng ki skul ha ki por kiba la leit, hynrei mynta ki la lah ban pynpaw ïa ka jingibit kaba khraw ha kane ka jingïalehkai ha ka jylla. Kane ka dei lyngba ka jingaiti bad ka jingtrei shitom jong ki samla karate, kumjuh ruh ki coach, ki nonghikai bad ki kmie ki kpa jong ki.
La sam ruh ïa ki khusnam ïa ki nongïalehkai kiba la khur ïa ka nam Karateka ha katei ka sngi ba khatduh jong kane ka lympung ïalehkai kaba lai sngi. Kine ki khusnam ki long sha u Trevor Ryntathiang na ka Sevenset HSS (junior boys), u Nathaniel J Thongni na ka All Saints Diocesan HSS (senior boys), ka Naomi Yuvinie Sylliang na ka Sacred Heart Girls HSS (junior girls), ka Dominica P Kharbani na ka Sacred Heart Girls HSS (senior girls). U Ïalamphang Kharkongor jong ka Shillong College bad ka Durka Padit jong ka Shillong College.
U kongsan ha kane ka sngi pynkut u dei u Shri C. T. Shyamdeo, Deputy Director jong ka SAI Centre, Shillong. U kongsan ha kane ka sngi plie pyrda u dei u Smti Isawanda Laloo IAS uba long u Secretary ka tnad Sports & Youth Affairs. Kiwei pat ki riew pawkhmat kiba la sakhi ïa kane ka jingleh ki kynthup ïa u Working President jong ka Meghalaya State Olympic Association u Shri John F Kharshiing bad u General Secretary ka MSOA u Shri Finely L Pariat, nalor kiwei kiwei.
Ïa ki khusnam la sam da u T.S Chavhan, Deputy Director ka SAI Training Centre, Shillong ha kaba la ïadon lang ki dkhot nongkitkam ka AMKA bad kiwei.
