Seoul, Nailar:
Ka iing kashari jong ka Suwon ha ka Sngi Palei ka la pyntip ba u CEO jong ka karkhana ba ju pynmih ia ki ‘lithium battery’ jong ka South Korea, ha ka Sngi Balang u la shah kem noh halor ka jingpluh jong katei ka karkhana kaba la shim ia ka jingim jong ki 23 ngut ha une u Jylliew ba la leit.
U Park Soonkwan, uba long u CEO jong ka Aricell, u la shah kem ha ka miet jong ka Sngi Balang halor katei ka jingjia ba shyrkhei, kaba la bam duh ia bun ngut ki mynsiem briew ha katei ka por.
Katkum ka jingpyntip jong ka tnat Labour Ministry jong ka South Korea, ka jingshah kem jong u Park, ka dei ka sien kaba nyngkong ba u CEO jong katei ka kompeni, un shah kem namar ki jingleh pynkheiñ aiñ kiba iadei bad ka Serious Accidents Punishment Act, ka aiñ kaba la pyntreikam ha u snem 2022 ban buh jingkitkhlieh ïa ki nongpynïaid kam haba jia ki jingjia ba sngewsih ha ki jaka trei lane hapoh ki kompeni jongki.
Ha katei ka jingpynbna, ka Labout Ministry ba dei khmih ia ki nongbylla sngi ka la ong ba u Park u la shah pynngat kyndon noh namar ka jingiap jong kitei ki 23 ngut da kaba pyntrei jubor ia kitei ki nongtrei kontrak ki bym pat don jingtbit ban trei ne pynïaid ia ki tiar lane ki kor machine kiba ap ka jingma ia kiba don ha katei ka jaka trei.
Kane ka jingpluh ka dei kawei na ki jingjia ba shyrkhei tam hapdeng ki jingjia ba la sakhi ha kylleng ki karkhana jong ka South Korea ha kine ki snem.
