Shillong, Nailar 29
Ka khubor ba la ïohlum na ki pulit ha ka Sngi Palei ka ïathuh ba uwei u nongshong shnong u la ujor ba ha ka 27 tarik Nailar ha ka por kumba 9:55 mynmiet, arngut ki runar kiba la shong da ka ar shaka ki la thombor ïa u da u nar rod bad ka tari bad ki la knieh ïa ka pla kaba don T. 25,000 bad ki kot ki sla ha RR Colony Rynjah, bad hadien kata ki la phet krad. Ïa une uba la shah shoh la pynkit noh sha Bethany Hospital ban shah sumar.
Ha kawei pat ka khubor, uwei u briew u la ujor ba ha ka 23 tarik Nailar ha ka por kumba 8:30 mynmiet, arngut ki runar kiba la shong da ka ar shaka ki la knieh ïa ka Mobile Phone jong u hajan ka shlem treikam jong ka NEEPCO, Laitumkhrah, bad ki la phet krad.
Sa ha kawei pat ka jingjia, ki pulit ki la ong ba u Manik Dey u la ujor ba ha ka step jong ka 27 tarik Nailar, ki runar ki la tuh ïa ka kali Maruti Eeco Van jong u (ML-05J-9707) na Laban.
Nalorkata, ki pulit ki la ong ba u Nelson Jyrwa u la ujor ba ha ka 26 tarik Nailar, ki runar ki la prong sha ka ïing sah jong u ha Mawlai Mawdatbaki, Nongpathaw, bad ki la ïoh tuh T. 10,000.
Shuh shuh ki pulit ki la ïoh ïa ka jingujor na u Pauuankhub Thomte ba ha ka 26 tarik Nailar, ki runar ki la leit rung sha ka ïing sah jong u ha Nongmensong bad ki la tuh ïa kawei ka Laptop kaba shongdor kumba T. 55,000.
Sa ha kawei pat ka jingjia, u Sunil Dawola u la ujor ba ha ka por 4 baje mynstep jong ka 27 tarik Nailar, ki runar ki la rung sha ka ïing sah jong u ha Wahheh, Shillong bad ki la tuh ïa ka Mobile Phone.
Shuh shuh ki pulit ki la ong ba u Menteilang Shadap u la ujor ba ha ka 27 tarik Nailar ha ka por kumba 10 are mynstep, ki runar ki la tuh ïa ka thuk-thuk jong u (ML-05V-9211) na ka shnong Umktieh kaba hap ha Umroi PIC.
