Shillong, Nailar 29
Kawei ka nongshong shnong ka khlem ngop watla ka la shah pynbiej ha uwei u briew uba dei u paralok lyngba ka ‘Facebook’ bad ka jingshah byrngem ha kiwei pat hadien ba uta u paralok u la kam ba u la tyrwa ïa ka jingai sngewbha kaba shongdor kumba T. 50 lak.
Katkum ka khubor ba la ïohlum na ki pulit ha ka Sngi Palei la ong ba katei ka nongshong shnong ka la ujor ba u paralok jong ka ha ‘Facebook’ ïa uba la pynithuh ïalade ba u dei u Frederech Fabian, u la tyrwa ïa ka jingai sngewbha kaba shongdor kumba T. 50 lak. Hynrei kane ka nongshong shnong ka la ong ba ka la kyntait ïa kata ka jingai sngewbha.
Kham hadien ka la ong ba u Fredrerech Fabian u la pyntip ïa ka ba katei ka jingai sngewbha ka la poi sha India bad u dawa pisa na ka. Hynrei katei ka nongshong shnong ka la kyntait ban ai ïa kata ka pisa ba la dawa. Watla katta, une u briew u la bteng ban pynthud ïa ka lyngba ka ‘Phone’.
Shuh shuh ha ka jingujor ka la ong ba ka la ïoh pdiang ïa ki ‘phone call’ ha kaba uta u briew uba kren u la pynithuh ïalade ba u dei uba trei bad ka tnat Customs, bad u la byrngem ïa ka ban pynjari da ki kyndon jong ka Money Laundering Act lada kam leh katkum ba la dawa na ka.
