Gaza, Nailar:
Ki heh ka World Health Organization (WHO) ki la iathuh ba ki shipai Israel bad ka kynhun lehnoh Hamas jong ka Palestine, ki la mynjur ban sangeh thma 3 sngi naka bynta ban ai dawai ïa ki 640,000 ngut ki khynnah bad khyllung kiba don hapoh nongbah Gaza ban pdiang ia ka dawai polio kumba ju leh man u snem bad man ki por.
U Rik Peeperkorn u la iathuh ba kane ka jingai dawai Polio kan sdang naduh ka Sngi U Blei bad kan kut haduh ka Sngi Ba-ar kumba la pynbeit ban pyntreikam ia katei ka thong haduh 3 sngi ba la rai ban sangeh shipor ia ka thma.
Kumta, la ong ba kane ka jingai dawai polio kan sdang na ki bynta phang pdeng jong ka nongbah Gaza bad nangta pat kan sa leit sha ka bynta ba Shathie jong ka Gaza, ha kaba kan don sa ka jingsangeh thma ba lai sngi bad hadien kata yn bud sa ka jingleit ai dawai Polio sha ka bynta ba Shatei jong ka Gaza.
Kumta, ka WHO ka la pyntip ba ha ka 23 tarik u Nailar, la don tang uwei u khyllung uba shah ktah na katei ka jingai dawai polio bad uba la thaw jingpang na katei ka jait dawai hynrei kiwei ki khyllung bad khynnah kim shym la shah ktah eiei ha katei ka jingai dawai Polio.
Ka tnat ai jingïarap jong ki shipai Israel (COGAT) ka la ong ha ka Sngi Palei ba ïa katei ka jingai dawai yn pyntreikam ryngkat da ka jingïatreilang bad ki shipai Israel, kum shi bynta ban pyntikna ia ka suk- ka shngaiñ jong ki riew paidbah haba ki leit ban ai dawai polio ia ki khun- ki kti jongki ha kitei ki sngi ba la buh.
