Shillong, Nailar 30
U Myntri Rangbah ka Jylla, u Conrad K. Sangma ha ka Sngi Thohdieng u la ong ba ka Sorkar kan sa wanrah ïa 50 tylli ki jaka ri dohkha bathymmai ban kyntiew ïa ka jingpynmih dohkha hapoh ka Jylla.
“Ka jingpynkhreh ban wanrah ïa 50 tylli ki jaka ri dohkha bathymmai ka la ïaid shakhmat. Ngi dang pyrshang ban kyntiew ïa ka jingpynmih dohkha da kaba buh jingmut halor ka jingjur jong ka jingdawa,” ong u Sangma haba jubab hapoh ïingdorbar.
U la ïathuh ruh ba na kine, la pyntreikam ïa 9 tylli ki jaka ri dohkha bad shen yn sa pyntreikam noh ïa ki 41 tylli kiwei pat.
Katkum ka jingïathuh u Myntri Rangbah, ka Jylla ka mad ïa ka jingduna dohkha kaba kumba 12,000 metrik ton – kaba long kumba ?250 klur.
Haba kdew ba ka la don teng ka por ha kaba ka Jylla ka shaniah kumba 75% ka jingwan poi dohkha na shabar, u la ong, “Mynta, hadien ba la shim ïa baroh ki sienjam, kumba 2/3 na ka dohkha la pynmih napoh ka Jylla. Kan shim por ïa ngi ban leh ha ka rukom kaba kham heh hynrei ki kam ki la sdang ïaid ha ka lynti kaba dei,” ong u Sangma.
U Myntri Rangbah u la ong ruh ba nalor ka jingpynbiang ïa ki jingai jinghikai ban pynbha ïa ka jingpynmih dohkha, ka Sorkar ka pynbiang ruh ïa kumba 5 ‘million’ tylli ki symbai.
Ka Sorkar ka la pynlut kumba 67 haduh 72 klur ban pynbha ïa ka jingpynmih dohkha ha kine ki 2-4 snem ba la dep.
Ha kawei ka liang, u Myntri Rangbah u la bynrap ba ka Sorkar kan sa buh kyndon haba phai sha ki jingïakop dohkha hapoh ka Jylla.
“Ngi la sdang ïa kane. Ngi la pynkhreh ïa ki kyndon bad ngin sa ïakren bad kito kiba don ka jingsngewkhia halor kane,” u la ong.
