Shillong, Nailar 30
U MLA ka Voice of the People Party (VPP) na Mawlai, Bah Brightstarwell Marbaniang, ha ka Sngi Thohdieng u la dawa ba ki shipai BSF kiba shah kynnoh donkti ha ka ban thombor ïa kawei ka khynnah ba dang 15 snem ka rta ha East Jaiñtia Hills ki dei ban shah pynngat hapoh ka aiñ Protection of Children from Sexual Offences (POCSO) bad ban tian bishar ïa ki ha ka ïingbishar ba khmih ïa kane ka aiñ.
U Bah Marbaniang u la ong ïa kane haba wanrah ïa ka ‘Call Attention’ ha ka sngi khatduh jong ka Dorbar Synrai.
U MLA u la ong ba katkum ki lad pathai khubor, ka kmie jong katei ka khynnah na kawei ka shnong hapoh katei ka distrik ka la kynnoh ba ki shipai BSF ki la thombor ïa ka khun jong ka (ba dang 15 snem) bad shoh ruh ïa u kurim jong ka ha a miet 19 tarik Jylliew, mynta u snem – kaba la bteng haduh ka shiteng synñia jong ka step 20 tarik Jylliew. Kane ka jingkynnoh katkum ka jingsngew u Bah Marbaniang ka long kaba hap ban shimkhia bad kam long kum kiwei pat ki jingjia kiba hashuwa naba ka jingkynnoh ka long kaba khraw bad ka khring ruh ïa ka aiñ POCSO, kaba ka thong jong ka, ka long ban ïada ïa ki khynnah na kiba bun ki kam kiba lah ban long kiba be-aiñ kum ki jingthombor.
Ha kajuh ka por, u la ong ba haba phai sha ka aiñ POCSO, ka Security Force Court kam don bynta eiei bad lada uno-uno u shipai BSF u shah kynnoh donkti ha kano-kano ka kam be-aiñ hapoh ka POCSO, hap ban tian bishar hapoh ïingbishar ka POCSO.
Haba batai shaphang kawei ka dur khih kaba la saphriang ha ki rynsan lad pathai, u la ong ba baroh ki lah ban sakhi ïa ka rukom long ki shipai BSF bad ki nongshong shnong khamtam ha ki jaka khappud .
Utei u nongmihkhmat u la ong ruh ba kaba kham sngewlyngngoh ka long ba la sakhi ba kitei ki shipai kim don ka ha ‘Uniform’ hynrei ki la riam kumba riam paidbah (naba kin hap phong ‘Uniform’ haba don hapdeng ka jingshakri), ha kawei ka liang kaba buh jingeh ïa ki nongshong shnong ban ithuh la kitei ki briew ki dei ki ‘gang’ ne ki ‘riew bat aiñ.
Haba kdew ba ka BSF ka don hapoh ka jingkhmih jong ka BSF Act, 1968, u MLA u la ong ba ka Section 46 jong kane ka aiñ ka kren halor ka ‘Civil Offence’ ha kaba uba nongpynkheiñ aiñ lada shah kynnoh, un shah tian bishar ha ka Security Force Court – kaba long kawei na ki daw ba bunsien ki shipai BSF (kiba la leh bun ki jingbakla), ki rieh tngen hapoh jong kane ka aiñ.
U Bah Marbaniang u la pynsngew ruh ba ka jingthmu ba hakhmat eh jong ka BSF ka long ban khang lad ïa ki kam be-aiñ na shiliang sha shiliang bad ka jingwanrung be-aiñ sha ka ri, kumjuh ban kyntiew ïa ka jingshngaiñ hapdeng ki briew ba shong ba sah ha ki jaka khappud.
“Hynrei haduh mynta kaei kaba ngi sakhi hapoh ka Jylla ka long markhongpong. Bunsien phin lap ba ki shipai BSF ha jaka ban wanrah ïa ka suk ka saiñ ha ki jaka khappud, ki long pynban ka jingwit bad wanrah ïa ka jingbym shongsuk shong shngaiñ ha ki shong khappud hapoh ka Jylla jong ngi,” u la ong.
Na ka liang u Symbud Myntri Rangbah ka Jylla uba khmih ïa ka tnad kam pohïing, Bah Prestone Tynsong haba jubab u la ong ba ka jingtohkit halor katei ka bynta pyrshah ïa ki shipai BSF la dep bad mynta la pynkhreh ban mudui noh.
U la ïathuh ruh ba la pynngat mukotduma ha thanad Khliehriat (Woman Police Station) hapoh ki kyndon 457, 236, 354, 384, bad 34 jong ka Indian Penal Code, ryngkat ki kyndon 7 bad 8 jong ka aiñ POCSO.
Shuh shuh u la bynrap ba la peit bniah ïa ka nongujor bad ki lanot ha ka 20 tarik Jylliew bad la tohkit ruh ïa ki, kumjuh la pyndep lut ïa baroh ki jingdonkam kum ka jingpeit bniah, ka jingleit mih sha ka jaka jong ka jingjia bad ka jinglum sabut, la leh katkum ka aiñ.
