Shillong, Nailar 30
Ka Tynring Sports Club bad Kharang Sports Club ki la khur ïa ka nam jop ha ka lympung ïalehkai SSA 3th Division 2024 ïa kaba la pynïaid da ka Shillong Sports Association ba la pynlong ha madan SSA ha Polo.
Haba phai sha ka jingïalehkai ba nyngkong, ka Tynring Sports Club ka la lah ban pynliem noh ïa ka Mawshuhbuit Sports Club da 2-0 kol. Ïa kine ki kol jong ka Tynring la ïoh ban khyrwit da u Commanding Swer marwei ha ka minit kaba 35 bad 75.
Ha ka jingïalehkai kaba ar, ka Kharang SC ka la pynliem noh ïa ka Lapalang SC da 5-1 kol. Ïa ki kol jong ka Kharang la ïoh ban thep da u Balajied Lyngwa ha ka minit ba 10 bad 47, u Freelyson Tariang ha ka minit ba 68, u Labanstar Tara ha ka minit ba 72 bad u Firstbornjohn Marwein ha ka minit ba 86. Katba ïa ka shi kol ka Lapalang la thep da u Lenginthang Changloi ha ka minit ba 90+2.
Ki jingïalehkai ki ban long pat ha ka sngi Saitjaiñ ka 31 tarik mynta u bnai ha kane ka lympung, kan long hapdeng jong ka Pomlakrai Sports Club pyrshah ïa ka Nongumlong Sports Club ha ka por 12.45 mynsngi ha madan SSA ha Polo bad ha ka por 3.45 janmiet pat kan long hapdeng ka Mawryngkneng Sports Club pyrshah ïa ka Nongmensong Sports Club.
