Shillong, Nailar 30
U Working President ka Khun Hynñiewtrep National Awakening Movement (KHNAM), u Bah Thomas Passah u la ong ba ka pynbeit pud ïa ki shnong bad ki konstitwensi na ka bynta ki ilekshon kam dei ban pynsuk ïa u paidbah, hynrei la pynbeit pud na ka bynta ban pynmyntoi ïa ki kyrtong bad ki seng saiñpyrthei.
Haba ïoh ban ïakren bad u Bah Thomas, u la ong ba na ka liang ka seng ha ka por ba u Lat ka Jylla u la pynjlan ïa ka ilekshon MDC ha ka khep kaba nyngkong haduh 6 bnai, ka seng ka la phah da ka shithi sha u Lat ha kaba na ka liang ka seng ka la kdew shai kdar ba katkum ki kyndon jong ka Sixth Schedule, kane ka jingpynjlan ka la long kaba be-aiñ namar u Lat ka Jylla u lah ban pynjlan ïa ka ilekshon sa tang lada don ka jingpynjari ïa ka ‘Emergency’ ne ka rai ba kyrkieh lyngba ka President ka Ri India bad u Lat u dei ban don ïa ka daw kaba khlaiñ bha halor ka jingpynjlan ïa ka jingpynlong ïa ka ilekshon.
“Kumba ngi la thoh da ka shithi sha u Lat ka Jylla ha ka khep kaba nyngkong bad ha kane ka shithi banyngkong ruh, ngi la kdew ïa kata ba ka ‘Emergency’ kam don bad kata ka daw ruh kam don,” la ong u Bah Thomas.
U la ong ba kumba ka long mynta ka ‘Delimitation Committee’ ka la dep ban aiti ïa ka kaiphod sha ka Sorkar halor ka jingphiah ïa ki konstitwensi bapher-bapher ha baroh artylli ki District Council bad ba ka Sorkar pat kan sa phah ïa kane ka kaiphod sha u Lat ka Jylla, bad kumta na ka liang ka seng ha kane ka sien kaba ar ka la phah biang da ka shithi sha u Lat ban ong ba nangne shakhmat kam don lynti shuh ban dang ïai pynjlan ïa ka jingpynlong ïa ka ilekshon MDC.
U la ong ba lada u Lat ka Jylla un sngap ïa ka jingkyrpad ka seng, ka mut ka rukom synshar paidbah kaba ju ong, ‘Ka Sorkar da u paidbah, na ka bynta u paidbah bad jong u paidbah’ kan don hynrei kumba ka long mynta hi, kane ka Sorkar jong u paidbah, ka la dep ban kut naduh u bnai Rymphang mynta u snem.
“Kane ka Sorkar, kum ka jingsngew jong ngi ka dei, ‘Da ka MDA, na ka bynta ka MDA bad jong ka MDA’. Kane ka long kaba sngewsih ha ka rukom synshar paidbah bad ngi khmih lynti ba na ka liang u Lat ka Jylla un sa peit bniah ïa kane ka jingthoh jong ngi bad shen ban pynbna noh ïa ka tarik ban thep vote ha ki District Council khnang ba u paidbah un ïoh ïa la hok jong u ban jied ïa u nongmihkhmat,” la bynrap u Bah Thomas.
Haba kylli hato ka jingpynjlan ïa ka ilekshon MDC sha ki District Council ka dei ka buit jongno-re-jongno ba kim kwah satia ban duh noh ïa ka jinglong MDC ne ban duh noh ïa ka shuki, u Bah Thomas u la ong ba naduh ka khep kaba nyngkong ba la pynjlan ïa ka ilekshon MDC, ka paw shai beit ba kiba bat ïa ka bor synshar mynta ki kwah ban bat jubor ïa ka bor kaba lah kut na ka bynta jong ki bad kane lehse ka lah ban dei ka jingtieng jong ki ban ïakhun ïa ka ilekshon ba ïoh ki shah rem noh.
“Kine kiba bat ïa ka bor mynta ki kwah ban bat jubor ïa kata ka bor kaba lehse, ka la kut na ka bynta jong ki bad kane ka dei ruh ka jingtieng jong ki. Lehse ki la sngewthuh ba 5 snem ki khlem trei katkum ka jingkhmih lynti jong u paidbah bad lehse ki la sngewthuh ba u paidbah un nym kyrshan shuh ïa ki,” la ong u Bah Thomas.
“Ha kaba kut hi ka ilekshon kan sa hap ban long bad nga tharai u paidbah un sa jubab lada dei ha kano-kano ka khyllipmat ruh bad u paidbah uba stad un sa bishar bha ïa kane ka bynta bad kiba bat jubor mynta, nga tharai ka khubor na ka liang u paidbah kan sa wan na ka bynta jong kine kiba shu thmu ban ïoh tulop ei beit mynta la 6 bnai,” u la ong.
Haba kylli ïoh kan dang don ka jingpynjlan ïa ka ilekshon MDC nangne shakhmat, u Bah Thomas u la ong ba lada na ka liang u Lat ka Jylla u dang pynjlan sa hynriew bnai ïa ka ilekshon MDC, kan sa don ka lynti kaba hap ban leit sha ïingbishar halor ka jingpynjlan ïa ka ilekshon.
“Lada na ka liang jong ka sorkar lane u Lat ka Jylla ki dang pynjlan ïa ka ilekshon, kan sa don kata ka bynta kaba ka ïingbishar kan sa hap ban tuklar ban bishar la hato ka jingpynjlan ka don ne em ïa ka nongrim kaba dei bad lehse ha kata ka por kan dei ka jinglehraiñ ïa ka sorkar jylla ne ïa kine kiba shu kwah ban pynjlan jubor ïa ka ilekshon,” la ong u Bah Thomas.
Shuh shuh u la ong na ka liang ka seng ka la ju kren bha ha kaba ïadei bad ka jingpynlong ïa ki ‘Delimitation Committee’ wat ha ki por kiba lah dep ruh ba ha kaba ka nongrim jong ki ‘Delimitation Committee’ ka dei ka jingpynbeit pud ha ka saiñ hima sima ne ka “Political Delimitation”.
“Khlem pynbeit pud ïa ki konstitwensi ban pynsuk ïa u paidbah, hynrei la pynbeit pud ïa ki shnong bad ki konstitwensi ban pynmyntoi ïa kyrtong ne ïa ki seng saiñpyrthei namar wat hadien ka jingpynbeit pud ruh, ka la don ka jingpyrshah na ki shnong kiba bun,” la ong u Bah Thomas.
