Shillong, Nailar 30
Ka Voice of the People Party (VPP) Jaiñtia Hills District kaba dang shu dep shong jingïalang ha ka Sngi Thohdieng ka la rai ban leit ïakynduh ïa u Symbud Myntri Rangbah ka jylla, u Bah Prestone Tynsong, uba peit ïa ka tnad District Council Affairs haba ïadei bad ka jingpyllait pisa sha Jaiñtia Hills Autonomous District Council (JHADC).
Haba ïoh ban ïakren bad u Bah Damewanhi Rymbai uba dei u Organising Secretary ka VPP Jaiñtia Hills District u la ïathuh ba ka por kan kut lashai ka sngi ba u Chief Executive Member (CEM) ka JHADC un siew noh ïa ka tulop jong ki nongtrei.
U la ïathuh ba shwa ban kut ka por, ka seng ka la shong jingïalang mynta ka sngi ha kaba la rai ba kan nym pat shim ïa ki rai ban ïakhih hakhmat ka phyllaw ka JHADC namar ka seng ka la ïoh jingtip ba ka Council ka la pynkhreh shaid-shaid ban siew tulop ïa ki nongtrei na ka pisa kaba T. 50 klur kaba ka la ïoh bhah na ka sorkar jylla.
U la ïathuh ba ka seng ka la rai ban leit ïakynduh ïa u Bah Prestone ban kylli jingmut ïa ka rukom pyllait pisa ka sorkar jylla kaba dei ka bhah sha ka JHADC.
“Ynda ngi la wan ïakynduh ïa u Bah Prestone ngin sa shong pyrkhat biang,” u la ong.
Kumban shu pynkynmaw ka VPP hapoh ka jingïalam u Bah Damewanhi ki la leit ïakynduh ïa u CEM ka JHADC, u Bah Thombor Shiwat, ban kylli ïa ka pisa kaba la phah da ka sorkar jylla haduh ban da mih ka thma ktien hapdeng ki arliang mamla.
Kane ka jingleit kylli ka VPP ïa u CEM ka long namar ka jingsngewkhia ïa ka jingduh tulop kaba la bun bnai ki nongtrei ka JHADC bad ki kwah ba baroh ka pisa ba ïoh na ka sorkar dei ban siew beit na ka bynta ka tulop sha ki nongtrei bad ym dei ban pyntreikam shawei pat.
