Mawkyrwat, Nailar 30
Ka Khasi Student’s Union (KSU) South West Khasi Hills District lyngba ka Sports Committee ka la pynkup burom ïa u Bah Kisstarlin Wanniang uba dei uwei na ki nongpynïaid ïa ki jinglehkai phutbol bad Futsal napoh South West Khasi Hills District.
Une u samla rangbah u la leit ban ïashimbynta kum u nongpynïaid ïa ki jinglehkai Futsal bad Beach Soccer ha ka National Level.
Ha u snem 2022, u la shah jied ban pynïaid ïa ka All India Futsal Clubs Championship 2022 ha New Delhi. Ha u snem 2023 u la shah jied ban pynïaid ïa ka Hero National Beach Soccer Championship 2023 ha Surat (Dumas Beach), Gujarat. Ha u snem 2024, u la shah jied biang ha ka All India Futsal Clubs Championship 2024 kaba la long ha Vadodara, Gujarat.
U Bah Kisstarlin u dei uba la ju leit ïa shimbynta ha ki jingpynïaid kum u Referee ha ki jingïalehkai Futsal bad phutbol ha kiba bun ki lympung kiba heh shabar jylla.
Kumta ka seng ka ai ka jingkitbok kitrwiang ïa une u samla ba un nang ïai trei shitom bad nangïai kiew ha ka sap ba u don khnang ba kan long ka jingsarong ïa ka dong ka thaiñ bad ka jaidbynriew hi baroh kawei.
