Jowai, Nailar 30
Ka Newhill Sports Club bad ka Lumpyrtuh Mihmyntdu Sports Club kila rung sha ka jingïakhun semi-final jong ka lympung ïalehkai 3rd Division Football Tournament-4th Adelbert Laloo Memorial Trophy ïa kaba la pynïaid da ka West Jaintia District Sports Association (WJDSA).
Kane ka la wan hadien ba ka Newhill SC bad ka Lumpyrtuh Mihmyntdu SC kila khur jingjop ha ka jingïalehkai quarter-final kaba la long ha madan Kiang Nangbah Stadium, Jowai ha ka sngi Thohdieng.
Haba phai sha ka jingïalehkai quarter-final kaba nyngkong, ka Newhill SC kala pynliem noh ïa ka Riatsaliya Mihmyntdu da 2-0 kol. Ïa kine ki kol jong ka Newhill la ïoh ban thep da u Fabies Gatphoh ha ka minit kaba 70 bad u Simeon Suchiang ha ka minit kaba 80+2.
Ha kawei pat ka jingïalehkai kaba bud, ka Lumpyrtuh Mihmyntdu SC kala pynliem noh ïa ka SCSC Nonglatem da 2-0 kol. Ïa kine ki kol jong ka Lumpyrtuh Mihmyntdu la ïoh ban thep da u Arwan Rymbai ha ka minit ba 39 bad Yooluti Pakma ha ka minit ba 46.
Lashai ka sngi Saitjaiñ pat ka jingïakhun quarter-final kan long hapdeng ka Myrjai Sports Club pyrshah ïa ka Pasyih Cultural Sports Club ha ka por 12.30 mynsngi katba ka Mookaswan Dongwah Sports Club pat kan ïakhun pyrshah ïa ka Mulang Ialong Sports Club ha ka por 2.30 nohphai sngi.
