Shillong, Nailar 30
Ki khynnah ïalehkai U-15 jong ka Nongjri Presbyterian Higher Secondary School kiba la rah ïa ka nam lahduh jong ka lympung ïalehkai U-15 Boys Subroto Cup, ha ka sngi Thohdieng ki la wan phai noh sha la jylla sha la ïing.
Ïa kine ki khynnah la leit ban pdiang burom ha kad liengsuiñ ha Guwahati da u MLA ka Mawhati u Bah Charles Marngar, ryngkat ka jingsynran lang jong u Assistant Director ka tnat Sports & Youth Affairs, u ADC Bah Shanlang Warjri, u District Sports Officer Bah Bobby Nongbet lem ki bahaïing hasem bad ki nonghikai.
Lah ban pynkynmaw ba ha ka 28 tarik u Nailar, ki khynnah jong ka Nongjri Presbyterian Higher Secondary School kila ïoh ban bat syndon ïa ka nam Champion ha ka lympung U-15 Subroto Cup da kaba pynliem noh ïa ka skul na Uttar Pradesh da 3-0 kol ha ka jingïakhun final.
Ka jinglah ban jop ïa kane ka final ym tang ba ka la pynlong ïa ka Nongjri Presbyterian Higher Secondary School ban rah ïa ka nam lahduh hynrei kumjuh ruh ban wanrah ïa ka nam ka burom ym tang ïa ka skul, ka shnong ne ka thaiñ hynrei ïa ka jylla hi baroh kawei.
