9 kol pynliem ka West Jaiñtia ïa ka East Jaiñtia, 6 kol ka Eastern Border ïa ka Mawshynrut

Shillong, Nailur 01

Ki kynhun kiba kynsai ha ka lympung ïalehkai jong ka Meghalaya Youth League 2024 ki la ïai bteng ban khur biang ïa ki jingjop ha ka jingïalehkai kaba hynñiew kaba la long ha ka sngi Saitjaiñ ha kylleng ki jaka.

Kiba kongsan napdeng kine ki dei ka West Jaiñtia District Sports Association ha ka Zone-B, kaba la jop ïa ka jingïalehkai U-14 jong ki pyrshah ïa ka East Jaiñtia District Football Association da 9-0 kol bad u Kaisarmi Dkhar u la khur ïa ka hat-trick. Hynrei ha kawei pat ka jingïakhun jong ka kyrdan ïalehkai U-16, ka East Jaiñtia ka la ïasam mar shi point pyrshah ïa ka West Jaiñtia hadien ba ki la ïakhaid da mar 2-2 kol.

Ka West Jaiñtia ka dangbat ïa ka kyrdan ba hakhmat eh ha baroh ar ki kyrdan ïakhun da kaba kamai 15 point ha ka U-14 bad 13 point ha ka U-16. Ka Amlarem Block Sports Asso-ciation kaba wan ha ka kyrdan kaba ar kam shym la don bynta ha kane ka jingïakhun jong kane ka taïew.

Kiwei pat ki jingïakhun ha kane ka zone la ïohi ba ka Laskein Block Sports Association bad ka Saipung Block Sports Association ki la ïasam mar shi point ha ka kyrdan U-14 hadien ka jingïakhaid khlem thep kol shwa ba ka Saipung kan pynliem ïa ka Laskein da 3-0 kol ha ka U-16.

Ka la don tang kawei ka jingïakhun ha ka Zone-A kaba dei ka jingïakhun kaba khatduh eh jong ka kynhun U-16 ha kaba ka Williamnagar District Sports Association kaba la lamkhmat, ka la lah ban pynliem ïa ka North Garo Hills District Sports Association da 3-0 kol. Te kumta ka Williamnagar ka la kamai 10 point bad ka NGH ka la ïoh 5 point.

Ha ka Zone-C, ka Shillong Sports Association ka la leit sha Sohra Sports Association bad ka la jop da 4-0 kol ha ka U-14 bad 8-0 kol ha ka kyrdan ïakhun jong ka U-16. Ka Ri-Bhoi District Sports Association kam shym la ïakhun ha kane ka sngi kut taïew, hynrei ka dangïai bteng ban bat ï aka kyrdan ba hakhlieh ha kaba ka la tam da 1 point ïa ka Shillong ha baroh ar ki kyrdan ïakhun.

Ha ka Zone-D ka la don tang kawei ka jingïakhun ha kaba Eastern Border Sports Association ka la lah ban pynjem khnap haduh 6-0 kol pyrshah ïa ka Mawshynrut Sports Association ha ka U-16. Ka jingjop da 1-0 kol na ka bynta ka Pyndengumïong District Sports Association ha ka kti jong ka Tyrsad Area Sports Association ka la pynlong ïa baroh ar ki kynhun kata ka Eastern Border bad ka Tyrsad ban khanglad ïa ka Pyndengumïong ha ka thup kamai point.

Kawei pat ka jingïakhun jong ka U-16 ka dei ka jingïakhaid mar 1-1 na ka bynta ki ar tylli ki kynhun kiba khlaiñ bor hapdeng ka Nongstoin District Sports Association bad ka Mawkyrwat District Sports Association. Kine baroh arliang mamla ki la ïakhaid ruh kumjuh ha ka kyrdan ïalehkai U-14.

Ka Pyndengumïong ka la pynliem ïa ka Tyrsad Area da 2-0 kol bad ka Eastern Border ka la pynliem ïa ka Mawshynrut da 1-0 kol ha kyrdan ïalehkai U-14.