Nongstoiñ, Nailur:
Ka Hynñiewtrep Youths’ Council, Nongtrai Circle ka la pynpaw ïa ka jingai jingkyrshan bapura ïa ka Joint Action Committee (JAC) jong ki lai tylli ki Polling Station ba kynthup ïa ka Mawsimai, Langdongdai bad Misei Polling Station kiba kynthup ïa ki 21 tylli ki shnong halor ka jingleit ban ai ïa ka dorkhast sha ka KHADC ban dawa ban pynhap ïa ki sha Mawshynrut konstitwensi.
U President ka HYC, Nongtrai Circle, u samla Olning Sohmad ha ryngkat u Secretary, samla Blasterland Sohmad ki la ong ba lada pynhap sha Rambrai konstitwensi ka la buh jingeh ïa ki namar ka la jngai palat, lada ïanujor bad ka jingjan bad ka jingjngai ka la kham jan sha Mawshynrut bad ka jingjan kong ki hapoh Mawshynrut ka long tang kumba 20 km tam eiei.
Hynrei lada pynngat ïa ki sha Rambrai, ka jingeh ka dei namar ka surok ruh khlem pat don ka lynti synkien ruh ym don, ki hap ban ïaid lyngba na Riangdo sha Nongstoiñ shaduh Rambrai ka jingjngai ka la palat da ki 100 km tam.
Shuh shuh ki la pynpaw ruh ba ha kaba ïadei bad ka Block ruh ka la kham jan hapoh Mawshynrut Block ban ïa kaba leit sha kiwei ki Block.
Kumta na ka liang ka HYC ka.buh ka jingkyrpad ïa ka Selection Committee jong ka KHADC ba ka dei ba sngap bad ban sngewlem ïa ka jingkyrpad jong ki paidbah kine 3 tylli ki Polling Station ban pynhap lem ïa ki sha Mawshynrut khnang ban buh ka jingsuk ïa kine ki nongshong shnong ïa ki jingdonkam wat hadien habud ruh.
