Shillong, Nailur:
Ha ka jingïai bteng ban nang pynsuk ïa ki nongthied bad ban pynbeit bha ïa ka rukom long trai jong ki nongthied kali lyngba ki buit treikam kiba thymmai, ka Toyota Kirloskar Motor (TKM) mynta ka sngi ka la ïasoi ïa ka soskular ïasngewthuh jingmut ne ka Memorandum of Understanding (MOU) bad ka Union Bank of India ban pynïoh ïa ka jingkyrshan pisa kaba bit ba biang. Ka jingthmu jong kane ka jingïatehlok ka long ban wanrah ki jingtyrwa kiba ha ka rukom kaba thymmai bad kaba wanrah ïa ki lad ki lynti ki ban khring ïa ki briew bad ha kajuh ka por ba kine ki jingtyrwa ki long katkum ka jingdonkam jong ki nongthied bad pynlong ïa ki ban suk bha ban ïoh ïa ki kali Toyota.
Haba kren shaphang kane ka siewjam treikam kaba thymmai na ka bynta ki nongthied, u Sabari Manohar, Vice President, Sales-Service-Used Car Business jong ka Toyota Kirloskar Motor, u ong, “Ngi sngewkmen ban ïoh ban ïatreilang bad ka Union Bank of India ban nang kham pynbha shuh shuh ïa ka rukom ai jingkyrshan pisa ban shim ram na ka bynta ban thied kali ha kylleng ka ri. Kane ka jingïatehlok ka pyni ïa ka jingtrei shitom jong ngi ban ai kaba bha tam sha ki nongthied da kaba pynsuk ïa ki ban ïoh ïa ka ram ban thied kali. Ka jingthmu jong ngi ka long ban pynbeit ïa ka rukom ai ram, ka ban pynaram khlem kino kino ki jingeh, bad ai ïa ka jingkyrshan ha ka por kaba biang ban pynlong ïa ka jingthied kali kaba sngewtynnad.
Kum ka shnat treikam kaba trei na ka bynta ban ai ka jinghun sha ki nongthied, ka bynta kaba ha khmat eh ka long ban pynbiang ïa ki jingdonkam jong ka ïew. Ngi la ïoh ïa kane da kaba ngi ïai bteng ban wanrah ïa ki lad ki lynti bad ki jingshakri kaban nang pynkhlaiñ ïa ka nongthied ha ka jinglong trai ïa ka kali jong ki. Lyngba kane ka jingïatehlok, ka jingthmu jong ngi ka long ban nang pynïar ïa ka jingpynpoi ïa ka kali bad ai jingkyrshan ïa ki nongthied ha kylleng ka ri, khamtam na ka bynta kito kiba don ha ki jaka ba kham sha kyndong bad kiba ha khap sor, kiba pyrshang ban thied ïa ki kali Toyota.”
Haba kren ha katei ka sngi, u Arun Kumar, General Manager, Union Bank of India, u ong, “Kum kawei na ki bank paidbah kaba heh tam, ngi sngewtynnad ban ïoh ban ïatehlok bad ka Toyota Kirloskar Motor. Ka jingiasoi ïa ka MoU ka la dei kawei na ki mawjam kaba heh ban pynïoh ïa ka jingkyrshan pisa ban airam sha bun ki nongthied, ha ka ri baroh kawei. Ka jingdon jong ka Union Bank of India ha kylleng ka ri ka long kaba biang bha ha kaba ïadei bad kane ka jingïatehlok bad ngi sngew shlur ba ka rukom treikam ban leh ïa ka jingairam ha ka rukom ka Digital ne ka Digitized Loan kan ïarap ïa ki nongthied kiba kwah ban thied ïa ki kali thymmai ka Toyota ha ka rukom kaba suk bad kaba aram bha. Ka jingtrei shitom jong ngi ka long ban pynbeit ïa ka rukom ai jingkyrshan pisa ban ai ram, bad kumta kan nang pynsuk ïa ki nongthied la ka long ha kali bad ki jingshakri..”
