Shillong, Nailur 01
Ka West Khasi Hills District Chess Association ka la pynlong ïa ka 1st WKH Inter Schools Chess Championship 2024 na ka bynta ka kyrdan ïalehkai Under-10, Under-12, Under-16 jong ki khynnah kynthei bad shynrang ha ka sngi Saitjaiñ ha SGSY Hall C&RD Block Nongstoiñ.
Ha kane ka lympung la wai ïashim bynta da 48 ngut ki khynnah na ki 9 tylli ki skul jong kane ka district. Ïa kane ka Championship la wan plie da u Additional Deputy Commissioner ka District U Bah H. Kerwood Thabah kum u kongsan ha ka jingïadon lang ki nonghikai ki kmie ki kpa bad ki nongkitkam ka WKHDCA.
Haba ai jingkren ha katei ka sngi u Kongsan u la kyntu ïa ki khynnah ba kin pynleit jingmut bha ha ki jingpule bad ha ka sap ba ki don bad ruh ban lait na ki jingmlien ba sniew. ia kane ka program plie la pynïaid da u President Bah Richar Sun.
Ha ka Under-10 jong ki shynrang la khur jingjop da u Paila Jyndiang, ba-ar u Wanmebanshan Khardewsaw na Anderson Higher Secondary School bad balai la khur da u Aaricson Marweiñ na ka KJP Synod. Ha ka Under-10 jong ki kynthei la khur jingjop da ka Amrisa R. Marak na ka Anderson Higher Secondary School, ba-ar ka Angelgrace Shyrkon na ka Mawkhlam Nongpyndeng UPS.
Ha ka Under-12 ki shynrang la khur jingjop da u Miquel Marweiñ na ka JNV Nongstoiñ, ba-ar u Raimankupar Jyndiang na ka Anderson Higher Secondary bad ka kyrdan balai ka leit sha u Nehboklang Shylla na ka JNV Nongstoiñ bad basaw u Kyrpang Sangriang na ka Anderson Higher Secondary School. Ha ka kyrdan ïalehkai Under-12 ki kynthei la khur jingjop da u Phibanri Diengngan, ba-ar u Wandarisuk Marbaniang na ka Anderson Higher Secondary School. Ha ka Under-16 la khur jinjgjop da u Brian CJL Marshillong na ka JNV Nongstoiñ, ba-ar u Atiarbakynsai Marthong na ka Anderson Higher Secondary School, balai u Wanlam Bok Nongrum bad basaw u Calvin Syiem na ka St. Peter Higher Secondary School Pyndengrei. Katba ha ka liang ki kynthei la khur jingjop da ka Phibanrisuklang Marbaniang, ba-ar ka Matrikor Wahlang, balai ka Darishisha Thabah bad ka Saphiriti Wahlang na Anderson Higher Secondary School Nongstoiñ.
Na ka liang ki bor pynïaid katei ka synjuk ki la pynbna ba ki nongjop ha kane ka lympung ki la shah jied ban mihkhmat ïa ka district sha ka Meghalaya State Level Inter School Chess Championship ka ban long ha St. Anthony’s Shillong ha ka 20 bad 21 tarik mynta u bnai. Kane ka kyrwoh ka la wan lyngba u Bah Richard Sun, President ka WKHDCA.
