Shillong, Nailur 01
Ka Dorbar Shnong Nongsohphoh, Upper Mawprem Shillong ka la pynlong ïa ka jingïalang ba kyrkieh ha ka 29 tarik Nailar hapoh ka ïingdorbar ha ryngkat ka jingïadonlang ki seng longkmie bad ki seng samla ban pynrem jur halor ka jingujor ejahar da kawei ka longkmie ha thanat Lumdiengjri ha ka 21 tarik Nailar, 2024 kaba la pharep ïa u Bah Hardy Ryntathiang, Secretary jong ka Dorbar Shnong, da kaba kynnoh ba u la jrong kti ïa ka.
Katkum ka kyrwoh khubor ba la phah da u Rangbah Shnong, President ka Seng Kynthei bad Seng Samla Shnong Nongsohphoh, ki la pynpaw ba u Secretary u dei uba la shah jied ha ki nongshong shnong bad uba la ïoh ïa ka jingithuh na u Syiem ka Hima Mylliem bad ka Khasi Hills Autonomous District Council (KHADC) na ka bynta ban pynïaid ïa ki kam shnong kam thaw bad ban pynneh ïa ka shongsuk shongsaiñ ha ka shnong bad kumjuh halor ki kam kiba ïadei bad ki bor sorkar, ki pulit bad kiwei kiwei.
“Ka jingai ejahar ka thew tang ïa u Secretary marwei, hynrei la shim ba ka dei ka jingthombor ïa ka Dorbar Shnong Nongsohphoh, Upper Mawprem baroh kawei,” la pynpaw ki nongïalam shnong.
Ki la pynpaw ba kane ka ejahar kam don eiei hynrei ka dei tang ban ïoh ban ïakhun pyrshah ïa ka ejahar kaba la ujor da u Secretary Shnong ha ka 17 tarik Nailar, 2024 ha kaba u nongkhaïi drok uba don jingïadei bad katei ka nongujor, u la shah kem ha ki nongïalam shnong, Seng Longkmie bad Seng Samla.
Ka Dorbar Shnong ka sngew ba katei ka ejahar ka long ka bym don nongrim bad la ujor ïa ka da ka jingthmu ym tang ban pynthohbria ïa u Secretary Shnong, hynrei ïa ka Dorbar Shnong Nongsohphoh, Upper Mawprem baroh kawei,” ki la bynrap.
Ka Dorbar Shnong ka la maham tyngeh ba kino kino kiba don jingïadei bad katei ka ‘riewshimet kaba la kynnoh khlem nongrim pyrshah ïa u Secretary bad ïa ka shnong baroh kawei kaba ïeng skhem ha ka nongrim ban ïoh ïa ka jingshisha bad ban pynthikna ba kitei ki jingkynnoh kiba khlem nongrim ki dei ban shah shimkhia katkum ki kyndon aiñ.
