Tura, Nailur 01
U nongïalam ka BJP bad MDC ka Tura, u Bernard N. Marak ha ka Sngi U Blei u la kyrpad ïa u Myntri Rangbah ka Jylla, u Conrad K. Sangma ban shimkhia hi dalade halor ka jingsahteng ka tulop kaba mad da ka GHADC bad kynnoh ruh ïa ki Executive Committee barim halor ka jingpyndonkam pisa bakla kaba shaba palat.
“Nga kwah ban-ban jur ba ki jingdawa jong ki nongtrei na bynta ka ‘5th Pay Commission’ ka long kaba ïahap bad nga ngeit phi tip shai ba ïa ka jingpynbna la pynmih da u CEM barim ka NPP jong ka GHADC ha u 2018 ban mynjur bad kyrshan ïa ka ‘Fifth Meghalaya Pay Commission’ vide no F(PR)-49/2017/192. Lyngba kane ka jingpynbna, la bthah ïa baroh ki tnad treikam ban pynkhreh ïa ka tulop bad jingsiew jong ki ophisar bad nongtrei ban khmih bniah thymmai ïa ka tulop bad ki jingsiew katkum ki kyndon ka ‘Meghalaya Services (Revision of Pay)’ lem bad kiwei-kiwei ki kyndon ba don jingïadei naduh u bnai Ïaïong 2018,” u la ong ha ka shithi sha u Myntri Rangbah.
U Bernard u la ong ba ïa katei ka jingpynbna ba la pynmih, ym shym la burom bad bud ryntih da kiwei pat ki Executive Committee, kiba dei barabor jong ka NPP.
U la pynkynmaw ba naduh u 2018 haduh mynta, la pynkhreh ïa ki Mang Tyngka bad mynjur ha ka ‘5th Pay Commission Scale’ hynrei ki nongtrei ki bteng ban ïoh ïa ka jingsiew hapoh jong ka ‘4th Pay Commission’, da kaba bynrap ba ka don ka jingbym biang ha ka Executive Committee.
Ha ka shithi, u MDC ka Tura u la pynsngew ruh halor ka mat jong ka ‘Peace Pact’ da ki kynhun ANVC, ka Sorkar Pdeng bad ka Sorkar Jylla ha u snem 2014 bad ong ba hadien ba la soi ïa ka, T.100.71 klur la mang kum ka song kyrpang, bud sa kiwei-kiwei ki song jingïarap ha ki snem kiba bud – kiba bud hapoh ka jingsynshar ka NPP hapoh GHADC.
Hynrei u la ong ba kane ha kawei ka liang, ka la ïalam sha kiba bun ki jingbym biang, kiba katto-katne ki don kiba sahteng ha ïingbishar katba kiwei pat ki don hapdeng ka jingtohkit. Shuh shuh u Bernard, haba ñiew ïa kane kum ka jingshet kylla ïa ki paid Garo, u la kyntu ïa u Conrad ban shimkhia ïa ka jingïateh bad ki kynhun ANVC ha u 2014 bad khot ïa ka jingïalang ban khmih bniah halor kane.
