Shillong, Nailur 01
Uwei u samla 19 snem u la shah kem katba uwei pat u dang phet rieh halor ka jingkynnoh ba ki la donkti ban leh be-ijot ïa kawei ka samla kaba la jia ha Malki ha ka Sngi Thohdieng.
Katkum ka khubor ba la ïohlum, katei ka samla ka la leit ai da ka ejahar ha thanat Laitumkhrah ha ka miet jong ka Sngi Thohdieng, ha kaba ka la ong ba ka jingshah leh be-ijot ka la jia ha ka Sngi Thohdieng hi bad ka la ai ïa ki kyrteng jong ki arngut kiba la kynnoh ba ki la donkti ha kane ka kam runar.
Hadien ba ki la ïoh ïa katei ka ejahar, na ka liang ki pulit ka thanat Laitumkhrah ki la kem noh ïa uwei na kitei ki arngut ha ka Sngi Saitjaiñ. Une uba la shah kem u dei uba la tip kyrteng kum u Andy Malngiang, 19 snem ka rta.
Hynrei ka khubor ba la ïohlum ka ïathuh ba sa uwei pat uba la shah kynnoh, ïa uba la tip kyrteng kum u Kitbok Reuben Mawthoh, u dang phet rieh. Hynrei ka jingthwet ïa une uba phet rieh ka dang ïaid shakhmat.
Ïa u Andy Malngiang la phah noh sha along (Judicial Custody) na ka bynta 14 sngi, bad ka jingkem ïa u ka long katkum ki kyndon 351(3) bad 70(1) jong ka Bharatiya Nyaya Sanhita (BNS) 2023.
