Kohima, Nailur:
U Symbud Myntri Rangbah jong ka Nagaland u Y Patton u la pyntip sha ka ïingdorbar jong ka jylla ba kam don satia kano kano ka khubor ban don kiba wan rung beaiñ na Bangladesh sha kane ka jylla hadien ba la don ka jingïakynad ha kaba ïadei bad ka kam saiñ pyrthei ha Bangladesh. U Patton ha ka jingai jubab ïa u MLA ka NPF u Achumbemo Kikon, uba la pynpaw ïa ka jingsngewkhia ha ka por ba don ka kynta kylli jingkylli halor ka jingwan rung beaiñ jong ki briew namar ka jinglong jingman ha Bangladesh.
U Kikon u la pynpaw ba ka thaiñ Shatei-lam-Mihngi, kaba ïasam ïa u pud u sam jong ka pyrthei bad ka Bangladesh, ka long kaba kham shah ktah bad pynpaw ïa ka jingtieng ïa ki briew kiba wan rung beaiñ sha Nagaland lyngba kiwei pat ki jylla. U la kylli halor ki lad ki lynti ba ka sorkar jylla ka la shim ban khanglad ïa kum kane ka jingwan rung beaiñ. U Patton uba bat ïa ka kam korbar ri, u la batai ba ka India ka ïasam ïa u pud u sam uba jrong da kumba 4,096 km bad ka Bangladesh, ha kaba ka West Bengal ka don ïa ka bynta kaba jrong tam kaba long 2,217 km bad ka Assam kaba lyngkot tam kaba long 262 km. U la kdew ba katba ka Mizoram, ka Meghalaya, bad ka Tripura ki ïasam pud bad ka Bangladesh, ka Nagaland pat kam shym don.
U Patton u la ïathuh ha ka ïingdorbar ba kano kano ka jingwan tuid sha Nagaland ka lah ban long lyngba ka Assam, bad pynthikna ba ka sorkar jylla ka buddien bha ïa ka jinglong jingman ha ka jingïatreilang bad ki bor syntiat bad kiwei kiwei ki kynhun wadbniah. Ban ïada na kano kano ka jingwan tuid bym long tynrai bad ban weng ïa ka jingkhuslai jong ki paidbah, ka jylla ka la bthah ïa ki bor synshar distrik kiba don ha khappud bad ka Assam ban pynlong ïa ki jingïalang ban pynïadei ïa ka jingpahara man ka por bad kiwei pat ki bor pahara.
U Patton u la pyntip sha ka ïingdorbar ba kam shym la don satia kano kano ka khubor ba ki wan rung beaiñ na Bangladesh sha Nagaland hadien ka jingkynrum kynram kaba dang shen ha Bangladesh. U la pynthikna ba ka sorkar ka la pynkhreh da ki lad ki lynti ban khanglad ïa kino kino ki jingwan rung beaiñ.
La sdang ïa ki lad ki lynti kiba kyrpang ha ka kyrdan jong ka distrik, bad la bthah ïa ki District Deputy Commissioner ban ïatreilang bad ki paralok jong ki ha Assam na ka bynta ka jingïatreilang bad ki jingpynbna ba man ka por.
La bthah ruh ïa ki ban pynkhlaiñ bha ïa ki jingkhynra ïa ki Inner Line Permit bad ban buddien bha ïa ki jaka ba dei ban khmih bniah hapdeng ki jylla. La bthah ïa ki pulit jong ka jylla ban long kiba husiar bha ha ki 13 tylli ki bynta khappud kiba don hapdeng ki jylla, ban pynlong ïa ka jingkhynra bad ka jingkhmih bniah ïa ki kali bad ban peitngor bha ïa ki jaka mane blei.
