Shillong, Nailur 02
Ka kynhun ‘thei ïalehkai jong ka Jylla ka la mad ïa ka jingshah rem da 10-0 kol ha ka Bihar ha ka jingïalehkai kaba nyngkong jong ka Group-B ha ka Sub-Junior Girls’ National Football Championship (Tier 1) kaba ka long ha ka Lah Sngi U Blei ha Malda kaba ha West Bengal.
Ka Anshu Kumari bad ka Rinki Kumari Chauhan ki la ïoh hat-trick na ka bynta ban pynlong ïa ka Bihar ban ïoh lai point ha kane ka jingïakhun.
Kumta ka Meghalaya kan pynkhreh biang ïa ka jingïakhun ka ban wan pyrshah ïa ka Karnataka ha ka 4 tarik mynta u bnai bad ha ka 6 tarik kan ïakynduh pyrshah ia ka Gujarat.
Ki ‘thei ïalehkai kiba la mihkhmat ïa ka Jylla ki long ka Dawansaphi Snaitang, Banyllashisha Nongkhlaw, Daficare Lyngkhoi, Nishalin Nongrum, Ridashisha Kharlyngdoh, Jenisha Rani, Shirley N. Marbaniang, Albela Ïangjuh, Deiphiwansara Lyngkhoi, Bandabetshisha Nongrum, Ephibat I Malieh, Saralang Lapang, Ïarisha Janong, Laiahunlang Nongrang, Pynhundashisha Lyngkhoi, Arizona Nongbri, Mayanylla Syiemlieh, Daphinia Rympei, Venecle Kharmusulman bad ka Barisha Marweiñ. Ïa kane ka kynhun la ïalam da u Bah Kitbor Kharkongor kum u coach, katba ka Ibashisha Khongwet kum ka manager bad ka Golden Jubilee Rymbai kum ka physio.
