Shillong, Nailur 02
Ka kynhun ïalehkai jong ka Myngken Christian HSS ka la jop ha kaba sdang ïa ka lympung ïalehkai 63rd Subroto Cup International Football Tournament hadien ba ka la lah ban pynjem khnap haduh 23-0 kol Dadra and Nagar Haveli and Daman and Diu (DD&DNH) kaba na Delhi ha ka Lah Sngi U Blei ha ka nongbah Delhi.
U Alice bad u Mebanlamlynti ki la ïoh mar ar tylli hat-trick da kaba thep 7 bad 6 kol. U Banpliebok u la ïoh kawei ka hat-trick da kaba thep lai kol. Ïa ki ar kol la thep da u Pynshai. Ïa kiwei pat ki kol la pynbud da u Franky, Bannganson, Bipiush, Andrew bad u Mebatskhem na ka bynta ban pynlong ïa kane ka kynhun kaba na Bhoirymbong ban khur ïa ki lai point na ka Group-G.
Kumba ka paw kane ka kynhun ïalehkai ka Jylla ka la lah ban pynpaw ïa ka jingtbit naduh kaba sdang ha kaba ka la ïoh ïa ki kabu kiba biang bad ka la lah ban pynurlong na ka bynta ban pynkhih jar bad kam shym la ailad ïa ka liang pyrshah ban pynphai wat shi kol ruh haduh kaba kut ka jingïalehkai.
Kane ka jinglah ban ïalehkai bha ka dei na ka daw ba ka la ioh ïmynsiem hadien ba ka kynhun ïalehkai jong ka Nongjri Presbyterian Secondary School ka la lah ban khur ïa ka nam lahduh ha ka sien kaba nyngkong eh ha ka kyrdan ïalehkai Under-15 hadien ba ka la lah ban pynliem ïa ka Major Dhyan Chand Sports College kaba na Utter Pradesh da 3-0 kol ha ka jingïakhun final kaba la long mynshem taïew.
Kumta ka Myngken kan pynkhreh ïa ka jingïakhun ba ar pyrshah ïa ka Chandigarh ha ka Sngi Ba-ar ha ka por 2:30 janmiet.
