Shillong, Nailur 02
Ka Employment Monitoring Cell jong ka Khasi Students’ Union (KSU) ha ka Lah Sngi U Blei ka la ïakynduh ïa ka District Medical & Health Officer (DMHO), East Khasi Hills District ban ujor halor ka kynrum-kynram pynlong eksamin thung kam ha ka district na bynta ka AYUSH Hospital kaba hap hapoh ka National Ayush Mission (NAM).
Ka District Ayush Society (DAS) ka la pyllait paidbah ïa ki post bapher bapher ha 13 tarik u Rymphang, 2024. Hadien ba ki samla ka jylla ki la dep aplai ïa kine ki post bapher bapher, la pynlong ïa ki eksamin na ka bynta kine ki post naduh u bnai Jymmang bad ïa ki risol dang shu dep pynmih ha kine ki sngi.
Ka seng ka dap da ka jinglyngngoh hadien ba ka ïohi ïa ka risol jong ka District Programme Manager. Na ka bynta kane ka post District Programme Manager ha East Khasi Hills la pyllait tang 1 (kawei), la don 20 (arphew) ngut kiba la aplai bad tang kine ki 20 ngut hi ba la bit ban thoh ïa ka eksamin ba la pynlong ha 29 tarik u Jylliew, 2024 katkum ka Notification ba la pyllait na ka ophis jong ka DHMO.
Hynrei ha ka por ba pynmih ïa ka risol jong kane ka eksamin la lap ba na ki 5 (san) ngut ba la pass ïa ka eksamin (written examination) ban ïaleh ïa ka ‘document verification’ ne ka ‘personal interview’, don 2 (ar) ngut na kita ki 5 ngut bym shim la mih kyrteng napdeng kita ki 20 ngut ba la pyllait katkum ka notification jong ka shlem treikam DMHO. Kane ka la pynsuba ïa ka seng bad ki paidbah baroh hi ba ka don eiei sha lyndet ba mih kyrteng jong ki briew ki bym shim la aplai ïa ka kam, bym shim la don kyrteng ha ka thup jong kita ki 20 ngut, hynrei la paw kyrteng pat ban ïaleh ïa ka document verification.
Halor kane, ka seng ka la pan jingpynshai na ka DMHO kaba dei ruh ka Member Secretary hapoh ka District Ayush Society, EKH. Na ka liang ka DMHO ka la pyntip ba la thung ïa u Nodal Officer ba kyrpang ban peit halor ka jingthung kam bad ka jingleh eksamin, bad ka kam shym tip bniah halor kane ka bynta hynrei ka la kular ba kan wad bniah halor kane ka bynta bad yn sa pyntip bad pynshai ïa ka seng lashai ka sngi.
Ka seng ka ju lap na ka por sha ka por ïa kum kine ki jingthurmur ha ki jingthung kam ha ki post bapher bapher. Ka jingsuba na ka liang ki paidbah ha kine ki sngi ki long ka jingthung kam hapoh ka jylla kam shym long kaba khuid hynrei ka long tang na bynta ki khun ki kti jong ki longheh longhaiñ.
Ka seng ka kwah ban ban-jur ba kum kine ki jingthung kam ka bym khuid kan dang ïai jia katba ka Sorkar kam pat shim pyntreikam ïa 20 tylli ki mat jingdawa jong ka seng ba la buh na bynta ka MPSC. Kine ki mat kim dei tang na bynta ka MPSC hynrei ïa baroh ki tnat treikam jong ka Sorkar Jylla baroh kawei. Kumta lada pynurlong lut ïa kine ki mat, ka seng ka ngeit ba kan wanrah shibun ïa ka jingkhuid ha ka thung kam ha ki tnat sorkar bad kan pyrkhing ïa kino-kino kiba mut leh tuh.
Ka seng ka bitar ruh wat lada katto-katne ki MLA ka jylla ki la ïakren ha ka dorbar thawaiñ ba la dep halor ki mat ban wanrah ïa ka jingthung kam kaba khuid hynrei ym shim ïohi ïa kano-kano ka resolution kaba pura halor kane ka bynta bad kiei-kiei baroh ki sah tang ha ka jingïakren.
Namar kata, ka seng ka maham jur ïa ka Sorkar ba lada ka Sorkar ka sngap jar halor ki 20 tylli ki mat jingdawa jong ka, ka seng ha ki sngi ki ban wan kan wanrah ïa ki jingïakhih bapher-bapher.
Kane ka long ka kyrwoh khubor na u Chairman ka Employment Monitoring Cell ka KSU, samla Reuben Najiar.
