Jerusalem, Nailur:
U Myntri Rangbahduh ka Israel, u Benjamin Netanyahu, ha ka Sngi U Blei u la byrngem tyngeh ba un pynkhadep noh ia ka jingleh palat jong ki lehnoh Hamas hadien ba ki shipai ka Israel ki la ioh sei ia ki met iap jong 6 ngut ki nongshah rahbor na kawei ka thliew ha ka nongbah Gaza.
Kumta ruh utei u nongialam ba hakhlieh duh jong ka Israel u la ong ba kito kiba pyniap ia kitei ki nongshah rahbor kim kwah satia ia ka jingiateh soskular jong ka jingiasuk bad jingsangeh thma. Na ka liang ka Israel kam banse ban ïaid shakhmat bad ban pyndep ia ka thong kaba ka la thmu naduh kaba sdang jong ka jingleit hiar thma sha Gaza namar kitei ki lehnoh Hamas kim don jingsngew eiei bad kim salia ban shim ia ka jingim jong ki paidbah nong Israel. Nangne shakhmat ruh ka Israel kan leh hi kumjuh ban thombor naphang ia kat kiba don ha ka nongbah Gaza khlem jing salia.
U Netanyahu u la ong ba ka Israel ka hap ban iakhun ha baroh ki liang pyrshah ia ki nongshun ba shyrkhei kiba kwah ban pyniap duh ia ki nong Israel baroh, da kaba kdew ruh ia ka jingsynreit kuli dusmon jong ki lehnoh hajan ka nongbah Hebron ha West Bank ha ki khyndiat sngi ba la leit, ha kaba kane ka jingjia ka la shim ia ka jingim jong 3 ngut ki heh pulit ka Israel kiba dang ap pahara ha katei ka jaka.
Katkum ka jing-ong jong u Netanyahu, u la ong ba ka jingshisha ba ka Hamas ka dang iai bteng ban leh ia ki kam sniew kum kito kiba ka la leh ha ka 7 tarik u Risaw, ka pynbor ia ngi ban leh ia kaba donkam ban pynthikna ba kam lah shuh ban shu sngap ne ailad ia katei ka kynhun lehnoh.
ba shyrkhei jong ka Palestine namar kan wanrah shuh-shuh pynban sa da kiwei pat ki jingma bad jingeh kiba kham jur hadien- habud lada yn dang ailad ia ka Hamas ba kan iai thombor kumne- shi kumne.
Katba, na ka liang ka Hamas pat, ka la iathuh ba katto katne na kitei ki 6 ngut kiba khlad, ki dei kiba ka Hamas ka la thmu ban pyllait noh lada don ka jingïateh kular bad ka Israel ban ia pyllait briew ne ban sangeh thma.
Ki lad pathai khubor ka Israel, ki la ïathuh ba uwei na kitei ki nongshah rahbor u dei u nong US-Israel, ia uba la tip kyrteng kum u Hersh Goldberg ryngkat bad 2 ngut kiwei ruh ia kiba la ïoh ban sei noh ïa ka met jongki na Gaza kiba kynthup ia u Carmel Gat bad u Eden Yerushalmi. Hynrei la ong ba ka Hamas ka la kam ba ka la thmu ban pyllait noh ia kitei kiba khlad lada dei ba ka Israel ka kloi ban sangeh thma naduh kine ki khyndiat por ba la leit.
Hynrei haba iadei bad ka jingiap jong kitei ki 6 ngut ruh, ka Hamas ka ka kynnoh kylla ia ka Israel ba kitei ki 6 ngut ki iap na ka jingther bom naphang jong ka Israel sha ka jaka ba ka Hamas ka la buhrieh bad pynshong ia ki.
