Shillong, Nailur 02
Ki pulit ka thanat Laitumkhrah ha ka step Lah Sngi U Blei ki la ïoh ban kem noh sa ïa uwei pat u samla uba la suba bad kynnoh donkti ban leh be-ijot ïa kawei ka samla ha Malki kaba la jia ha ka Sngi Thohdieng.
Katkum ka khubor kaba la ïoh lum la ong ba ïa une u samla uba la tip kyrteng kum u Kitbok Reuben Mawthoh la ïoh ban kem na Smit, uba la phet rieh naduh ka janmiet jong ka Sngi Saitjaiñ.
Shuh shuh la ong ba ïa Kitbok la ïoh kem noh da ki pulit na ka ïing jong ka kiaw kurim jong u kaba don ha ka Dong Lum Kynsai ha shnong Smit ha ka jingïadon lang ki nongpynïaid dong.
U Kitbok uba la shah kem, u dei ruh uba la phet rieh hadien ba kawei ka kynthei ka la ujor da ka ejahar ha ka miet jong ka 30 tarik mynshem bnai, ba ma u bad uwei pat u paralok jong u ki la batbor ïa ka.
Lah ban kdew, ba ha ka Sngi Saitjaiñ, kawei ka kynthei ka la ujor ejahar ba ka la shah thombor bad shah leh be-ijot ha ar ngut ki briew ha Malki. Ha kane kajuh ka sngi, ki pulit ka Laitumkhrah ki la kem noh ïa uwei napdeng kine ar ngut uba kyrteng kum u Andy Malngiang, 19 snem ka rta.
Ha kaba ïadei bad kane ka jingïoh kem, ka ïingbishar ka la ai rai ban set ïa une u briew 14 sngi hapoh ka Judicial Custody.
