Ha ka sngi ba u jop ïa ka ilekshon MP na Tura, u Saleng A Sangma u la kren shai ba ym don jaka shuh ïa u Myntri Rangbah barim, u Dr Mukul M Sangma, u Myntri sorkar barim, u Zenith M Sangma, ba kin wanphai sha kane ka seng. U Saleng u la jop kput pyrshah ïa ka kyrtong ka National People’s Party (NPP), Agatha K Sangma, kaba dei ruh ka para trai jong u Myntri Rangbah, u Conrad K Sangma, ha kane ka ilekshon MP kaba la dep katba u Zenith, uba la ïakhun na ka All India Trinamool Congress (AITC) u la wan ha ka kyrdan kaba lai.
Hynrei shwa ka Dorbar Synrai jong ka Ïingdorbar Thawaiñ, lai na ki saw ngut ki MLA ka Congress ki la leit ban pynïasoh bad ka NPP haduh ba u Nongïalam ka Liang Pyrshah ha kato ka por, u Bah Ronnie V Lyngdoh, u la shah ieh marwei. Namarkata, kato ka sngi hadien ba ryngkang dieng kper jong lai ngut ki MLA, u Bah Ronnie u la hap ban iehnoh ïa ka shuki Nongïalam ka Liang Pyrshah.
Tangba ha kajuh ka por, u Bah Ronnie u la leit ai jingkyrshan ïa ka All India Trinamool Congress haduh ba u Dr Mukul u la ïoh lad biang sa shisien ban wanphai kum u Nongïalam ka Liang Pyrshah katba u MLA ka Mylliem u la shah jied ban long kum u Nongbat Shabuk lane Chief Whip jong ka Liang Pyrshah. Hangne ka la paw shai ba ki nongïalam ka Congress kim don ka jingïasngewthuh hapdeng jong ki. Uwei u kyntait katba uwei pat u pdiang ïa u Dr Mukul! Haba kut, ïoh jingmyntoi ei u Dr Mukul!
Ngi lah ban kdew ba naduh u snem 2013, ka jingïadei hapdeng u Saleng bad u Dr Mukul ka la sniew khamtam hadien ba u la shah pynduh tiket ban ïakhun na ka Congress ha ka ilekshon MLA kaba la long ha kato ka por. Hashwa kata, u Saleng u la long kum uwei na ki Myntri ha ka sorkar ba la ïalam da u Dr Mukul.
U Dr Mukul lem bad 11 ngut ki MLA Congress ki la mih noh na kane ka seng ha u snem 2021 hadien ba ka All India Congress Committee (AICC) ka la thung ïa u MP barim ka Shillong, u Bah Vincent H Pala, kum u President ka Meghalaya Pradesh Congress Committee (MPCC). U Saleng u la wanphai sha ka Congress hashwa ka ilekshon jong u snem 2023, bad dei tang ma u, uba la jop na ka seng Congress ha kato ka ilekshon na Rilum Garo. Hadien jong ka ilekshon MLA 2023, ka la don ka jingïakren ba u Dr Mukul bad ki saw ngut ki MLA ka AITC kin wanphai biang sha ka Congress. Hynrei haduh mynta, ka khlem pat urlong.
Wat la kata ka jingïakren halor ka jingwanphai jong u Dr Mukul kam pat kut, na ka liang u Saleng pat u la kren shai ba un ym ailad ïa une u Myntri Rangbah barim ban wan pynïasoh biang sha ka Congress. Kane ka pyni shai ba ki don napdeng ki nongïalam ka Congress ki bym kwah shuh ïa u Dr Mukul ba un wan biang. Hynrei kumba ju long ka rukom, ka rai ba khatduh la ban pdiang ne kyntait ïano-ïano kan shong ha ka AICC kaba don ha New Delhi. Lada baroh ki MLA ka AITC kin rung sha ka Congress, ka jingbun paid ha Ïingdorbar Thawaiñ kan kiew sha ka 6 ngut. Tangba kam pat biang ban ïatynjuh bor bad ka liang synshar kaba don 49 ngut ki MLA, bad na kine, 31 ngut ki dei na ka seng NPP. Mynta ngin hap ban ïa ap sa ïa ka ilekshon shiteng samoi ka ban long ha Gambegre konstitwensi ha kaba ka jingïakhun kan long kaba itynnad khamtam hapdeng ka NPP bad ka Congress.
