Shillong, Nailur 03
U Rangbah Shnong ka Riat Laban-Kynjatphutbol u Bah Shaiphar Wahlang u la pynpaw ba kum ka shnong kampher wat la ka dei kaba rit, hynrei ka thrang bad angnud ba ka sports club kaba don ha ka shnong kan thaw kan plie ki lad ki lynti ba kan leit pynïasnoh noh ïalade bad ka Shillong Sports Association kaba dei ka synjuk ïalehkai kaba la rim tam ha ka Jylla.
U la pynpaw ba kum u nongïalam jong ka shnong kaei kaba u lap bad shem hi ka long ba ka shnong wat la ka dei kaba rit, hynrei na ka por sha ka por, ki don bun bun ngut ki khynnah kiba la mih na ka shnong ban ïalehkai ïa ka phutbol, kaba don ruh ki khep ki ju wanphai sha la shnong bad ka jingjop.
U Bah Shaiphar um lah ruh khlem da pynpaw ïa ka jingsngew sarong ïa ka nam bad ka kyrteng jong u Donborlang Nongkynrih, u samla ïalehkai ba la mih ban ïalehkai na kiba bun ki kynhun bad ki klob bad ban ïai bteng tad haduh ban da mihkhmat ïa ka Jylla wat haduh ka Santosh Trophy. Nangta ki nongïalehkai barim kum u Bah Laibor, Cheston, Gilbert kiba la bteng ban mihkhmat ïa ki kynhun ïalehkai ba la paw ka nongbah.
Kumta u Bah Shaiphar um lah khlem da ai khublei ïa la u MLA u Bah Sanbor Shullai uba la buh ïa ka jingkular bad ka Riat Laban Dorbar kaba la ai ïa ka jaka kaba heh ban shna ïa ka madan ïalehkai phutbol.
Ïa kane ka jaka la dep ban leit peit da u Bah Sanbor ryngkat bad ki nongtrei jong ka tnat ïalehkai ka sorkar Jylla ha kaba la lap bad shem ba ka jaka hi ka long kaba biang ban shna ïa ka madan bad kum u Rangbah Shnong u don jingkyrmen ba ka kam hi kan sa bteng ba kan jam shakhmat.
