Shillong, Nailur 03
U Chief Executive Member (CEM) ka Khasi Hills Autonomous District Council (KHADC) Bah Pynïaid Sing Syiem u la ong ba dang lah ban shah khot kum ki MDC kiba la kut ka por ne ‘expire date’ kiba dang treikam ban ïa u Bah Ardent M Basaïawmoit, u President ba mynta ka Voice of the People Party, uba la long MDC teng uba la hiar shuki noh shiteng por.
U Bah Pynïaid u la pynpaw ïa kane haba ïakren bad ki nongthoh khubor halor ka jingshah kynnoh ha kine ki sngi ba ki MDC mynta ki dei kiba la kut ka por hynrei la shu pynjlan jubor da ka sorkar jylla.
U Bah Pynïaid u la ong, ban pynlong ïa ka ilekshon ka dei ka kamram jong ka sorkar jylla ba kan pynïaid hynrei u la pynpaw ka jingsngew lyngngoh ba u Bah Ardent ha ka por ba u long MDC ha ka samoi treikam 2014 haduh 2019, u la hiar shuki noh kat haduh ba ka council ka hap pynlut pisa haduh T.3 klur ban pynlong ilekshon ha ki konstitwensi ba hiar shuki ki MDC kiba bat lang ïa ka kam MLA ha kito ki snem ba la dep.
“Ngam don eiei ban kynthoh ïa ki MLA bad ki nongïalam bym don nongrim, namar ka jingpynjlan ka sorkar ïa ka ilekshon MDC ka nongrim ka long ban wanrah jingbit jingbiang ïa ki konstitwensi, namar ka don ka jingud na ki shnong namar ki don ki konstitwensi kiba la rit bad don kiba la heh ba dei hangne ngi la thaw ïa ka delimitation committee,” u la ong.
U la ong ba kampher ba ki ong ïa ki MDC ba mynta kum ki dawai ba la kut ka por hynrei ki dei pat ki MDC kiba dang shna aiñ kiba pyrshang ban trei bha ïa ka KHADC ban myntoi ki paidbah ym dei kum ki MLA kiba bat kum MDC kiba hiar shuki shiteng por.
“Ngi dei ki dawai ba la kut por, dang lah ma ngi ki MDC ba dang shna aiñ bad kiba pyrshang ban trei ïa ka KHADC ban myntoi ki paidbah, ban ïa u MLA bad MDC u hiar shuki,” la ong u Bah Pynïaid.
Ha ka juh ka por u la pynpaw ba um don ka jingtieng ïa u MLA ka VPP uba dang shu jop ïa ka ilekshon MLA na Mawryngkneng konstitwensi Bah Heavingstone Kharpran hynrei ki la don ki ‘riew pawkhmat na Nongthymmai konstitwensi kiba la wan tyrwa ïa u ban ïakhun noh na Nongthymmai ha ka ilekshon MDC.
Nalor nangta, u la ïathuh ba la shem taïew un sa shong jingïalang bad ki nongkitkam jong u na Sohryngkham konstitwensi bad un sa pyntip la un dang ïakhun na Sohryngkham ne Nongthymmai konstitwensi.
U la ïathuh ruh ba um don kano-kano ka jingtieng ïa u MLA ka VPP namar ki nongkyrshan jong ka VPP ha Mawryngkneng konstitwensi ki la ïakynduh jingeh ha ka pang ka shitom bad kiwei de namar u MLA ba mynta um lah ban ïarap.
“Nga dei u shipai, ngin ïakhun beit namar ha ka saiñ pyrthei don ka por ba ngi rem bad don ka por ba ngi jop,” u la ong.
