Shillong, Nailur 03
Halor ka jingïeng shakhmat jong 7 tylli ki hospital na Shillong halor ka mat jong ka jingsahkut ïa ka jingïoh ne ki jingsiew jong ki hapoh ka hospital, kane ka la poi sha ka jingtip jong ka tnat kaba la khot pat ïa ka jingïalang ba kyrkieh ha ka 2 tarik Nailur, 2024 da u Chief Executive Officer jong ka MHIS.
Ha ka kyrwoh khubor, ka Myntri ka tnat ka koit ka khiah ka Kong Ampareen ka la ong, ha kane ka jingïalang la lah ban sngewthuh ba kiba bun ki mat ki la mih na ki jingsniew kynsan jong ki tiar dang shen, kaba la ju jia teng bad ka ban bteng ban jia namar ka software pyntreikam kaba thymmai.
Ka la ong, na ka por sha ka por la ju pynlong ïa ka jingïalang jong ka State Level Grievance Redress bad kaba dang shen ba la pynlong ka dei ha ka 2 tarik mynshem bnai ha kaba bun ki mat kiba la wanrah la lah ban pynbeit.
Ka Kong Ampareen ka la ong, ka jingjia ïa ka MHIS kam dei ka sien ba nyngkong, hynrei man la u snem ha ine juh por ju mih bad don ka jingbym ïasngewthuh bad ong ba ka jingsiew ba la ai na ka bynta ka MHIS sha ki hospital la dep phah, don jingeh khyndiat ha ka kor ‘portal’.
Halor kane, ki paidbah kim dei ban lynga, namar ka don jingbym sngewthuh namar ka pisa ba la mang ban leit sha ki account jong ki hospital riewshimet, kam lah ban poi ka dei na ka ‘technical problem’ ne ki daw ki kor ki bor.
Ka la ong, ka MHIS ka la bteng ban nang khlaiñ lyngba ka jingbun jong ki nongïoh jingïarap lyngba kane ka scheme na ka bynta ka samoi kaba long tang hapdeng u Nailur 2023 haduh Nailar 2024 ha kaba ki la don haduh palat 1,53,445 ba la ïoh jingïarap bad ka pisa ruh ka la kot shaduh ka T.216 klur.
Ka Myntri ka la ong ba na kane ka pisa, ka pisa ba la siew ka long haduh T.141 klur. Hadien ka jingshah kyntait, ka jingkam pisa kaba T.48 klur ka dang sah na ka bynta ban siew. Na ka T.48 klur kaba dang sah, T.18 klur ka dang sahkut ban siew sha baroh ki hospital shimet hapoh ka jylla bad kane ka dei namar ki jingeh na ki kor.
Wat la ïa kane ka kam la dep ban ïakren bunsien bad ka National Health Authority, hynrei haduh mynta ym pat lah ban pynbeit ïa kane ka kam, la ong ka Kong Ampareen bad bynrap ba u CEO un sa leit sha ka shlem treikam jong ka NHA ha Delhi ha ka 5 tarik mynta u bnai ban ïakren halor kane ka kam.
Ha kawei pat ka liang, ka Myntri ka la pyntip ba ki hospital shimet ha nongbah Shillong ki la sdang biang ka jingtreikam bad ban shim ïa ki nongpang kiba wan lyngba ka skhim MHIS.
