Jowai, Nailur 03
Ka Newhill ka la lah ban pynthikna ban jam sha ka final jong ka lympung ïalehkai 3rd Division Football Tournament- 4th Adelbert Laloo Memorial Trophy ba la pynïaid da ka West Jaiñtia District Sports Association (WJDSA).
Kane ka jinglah ban pynthikna ka la wan hadien ba ka la pynliem noh ïa ka Lumpyrtuh Mihmyntdu lyngba ka tie-breaker da 4-2 kol ha ka semi final kaba la long ha ka Sngi Ba-ar ha madan Kiang Nangbah Stadium, Jowai.
Ka jingïakhun kaba la buh por ban pyndep ka la kut khlem da lah ban pynkhih jar kol bad la rah shaduh ka extra time bad hangne ruh ym don ba lah ban pynkhih jar. Te kumta dei ha ka jingïashut tie-breaker ba ka Newhill ka la khur ïa ka jingjop.
Haba phai sha ka jingïalehkai jong ka 2nd Division Football Tournament na ka bynta ka 7th Debo Shullai Memorial Trophy, ka Mukhla Umlangshor ka la jop da 3-2 kol ïa ka Khliehmynkrem.
Ïa ki kol jong ka Mukhla Umlangshor la thep da u Rio Lyngdoh haka minit kaba 18 & 58 bad u Nio Sumer haka minit kaba 67. Katba ïa ki kol jong ka Khliehmynkrem la thep da u Mebanker Challam ha ka minit kaba 16 bad u Daman Nongjngi ha ka minit kaba 65.
