Shillong, Nailur 03
Ka Mylliem Lum ka la ïoh jingjop kaba nyngkong eh ha ka lympung ïalehkai Second Division Football League 2024 ba la pynïaid da ka Shillong Sports Association, hadien ba ka la lah ban pynliem noh ïa ka Pay For Right Football Academy da 3-0 kol ha ka Sngi Ba-ar.
U Balan Mawlong u la ïoh ban thep ar kol bad ïa kawei pat la pynbud da u Rapborlang Jana na ka bynta ban pynlong ïa kane ka kynhun ban ïoh ruh lai point.
Ha kane ka jingïakhun kaba la long ha SSA Stadium kaba ha Polo, ka Mylliem Lum ka la lah ban ïalehkai bha naduh kaba sdang ha kaba ka la ïoh ban pynkhih jar nyngkong eh lyngba u Balan Mawlong ha ka minit kaba 8. Kane ka shi kol ka la ïai neh haduh kaba kut jong ka kylla step na ka daw ba ka liang pyrshah kam shym la lah ban pynphai.
Hadien katto katne por ba la bteng ïa ka jingïakhun jong ka kylla miet baroh ar ki kynhun ki ka pyrshang ban ïakhun tyngeh. Hashwa ban wai u Balan u la thep biang sa shi kol ha ka minit kaba 81. Kane ka kynhun ka la thep biang ïa ka kol kaba lai bad kaba khatduh lyngba u Rapborlang Jana ha ka minit kaba 88 na ka bynta ban khur syndon ïa ka jingjop.
Haba phai sha kawei pat ka jingïakhun kaba ar, ka Nongkrem SC ka la pynliem noh ïa ka Jongksha SC da 4-3 kol. U Zothampuia Bawihtlung u la ïoh ban thep ar kol na ka bynta ka Nongkrem ha ka minit kaba 4 & 10, katba ïa kiwei pat la pynbud da u Jefferson Pakynteiñ (26) bad u Banlum Kharsyntiew (90+1).
Na ka liang ka Jongksha ka la lah ban pynphai kylla da u Donbok Lyngdoh ha ka minit kaba 37 & 64 bad u Basuk Bina (45) hashwa ba kan mad ïa ka jingshah rem.
Kane ka lympung kan bteng biang ha ka sngi Balang ha kaba Laitkyrhong SC kan ïakhun pyrshah ïa ka Imson SC ha ka por 12:30, katba ka Marbisu SC ïa ka Laitlyngkot SC ha ka por 3:30 janmiet.
