Shillong, Nailur 03
Lai ngut ki khynnah ïalehkai phutbol kiba pule ha O.M Roy Memorial School kaba don ha Mawlai Kynton Massar, ki la shah jied ban leit shah hikai pyntbit ha ka shlem ai jinghikai jong kawei ka klob ïalehkai Indian Super League, ka Punjab Football Club.
Kine ki kynthup ïa u Mebudlang Bareh, Lekystar Wanniang bad u Lionel Marngar.
U Mebudlang u dei u khun jong ka Kong Ester Bareh bad Bah Bhaboklang Nongkynrih ba shong ba sah ha Riat Laban-Kynjat Phutbol. U Lekystar u dei na Umsamlem kaba na Ri Bhoi District bad u Lionel Marngar u dei na ka shnong Mawphanniew kaba na Mairang.
Lah ban kdew ba ka jingshah jied jong kine lai ngut ki heprit ka la wan hadien ba ki la lah ban pynpaw ïa ka jingtbit na ka bynta ka kynhun ïalehkai jong ka 4FORALL Football Academy kaba la leit shim bynta dangshen ha ka DPDL Super Cup 2024 kaba la long ha Bengaluru bad kane ka kynhun ka la rem noh ha ka semi final.
Ha katei ka lympung u Lionel Marngar u la ïohpdiang ïa ka nam kum u rangthep kol ba kynsai (top scorer) bad u Lekystar Wanñiang kum Best Midfielder.
