Shillong, Nailur 03
Ka Myngken Christian HSS ka la bteng biang ïa ka jingjop kaba ar ha ka lympung ïalehkai 63rd Subroto Cup International Football Tournament hadien ba ka la lah ban pynliem noh ïa ka lahduh jong mynshem snem ka Chandigarh da 1-0 kol ha ka Sngi Ba-ar ha nongbah Delhi.
Kane ka nam jop ka la wan urlong lyngba u Banganson Nongphlang na ka bynta ban pynlong ïa ka Myngken Christian HSS na Bhoirymbong ban ïoh 6 point na ar sien ïakhun jong ka Group-F.
Ha kane ka jingïakhun baroh ar ki kynhun ki la pyrshang ban ïakhun tyngeh naduh kaba sdang ha kaba ki la ïoh ïa katto katne kabu kiba biang, hynrei kim shym la lah ban thep. Dei ha ka minit kaba 16 ba ka Myngken ka la ïoh ban pynkhih jar nyngkong eh lyngba u Banganson. Kane ka jingïoh ban thep kol ka la wan urlong hadien ba u rangapkol ka liang pyrshah u la kum pyllait ïa ka bol na kti bad dei hangne ba u Banganson um shym la pynlehnohei ïa ka kabu ksiar.
Kane ka shi kol ka la pynkyndit bynriew ïa ki rangïalehkai ka Chandigarh, ha kaba ki la pyrshang ban ïakhun tyngeh na ka bynta ban pynphai, hynrei kim shym la lah ban pynurlong haduh kaba kut jong ka kylla step.
Hadien katto katne por ba la bteng ïa ka jingïakhun jong ka kylla miet baroh ar ki kynhun ki la ïakhun tyngeh bad khamtam eh ka Chandigarh kaba dangdonkam ban pynphai. Hynrei ki rangialehkai ki la ïashan tyngeh khlem da ailad ïa ka liang pyrshah ban pynphai bad ha kaba kut ka la lah syndon ban khur ïa ka jingjop.
Lyngba kane ka nam jop ka Myngken ka la don jingkyrmen ban ïoh rung sha ka quarter final, hynrei ka donkam ban ïakhun tyngeh ha ka jingïalehkai kaba khatduh pyrshah ïa ka Bihar ka ban long ha ka sngi Balang ha ka por 4:30 janmiet.
