Kabul, Nailur:
Katkum ki khubor, la ong ba uwei u ‘riew kheiñduh u la pynbthei ialade ha kawei ka nongbah jong ka ri Afghanistan ha ka Sngi Nyngkong, ha kaba 6 ngut ki la duh noh ia ka jingim ha bad 13 ngut pat ki la mynsaw.
La ong ba wat la jingjia thombor ki la duna ha Afghanistan naduh u snem 2021 ba ka Taliban ka la ioh knieh ia ka bor synshar hapoh katei ka ri. Hynrei, la ong ba katto katne ki kynhun lehnoh jong ka jaitbynriew Islamic State, ki dang iai treikam bad ialeh pyrshah hi ia ki bor pynïaid ka Afghanistan (Taliban) wat haduh kine ki sngi.
Tad haduh ka step Sngi Ba-ar ba la pyllait ia kane ka khubor, ym pat shym la don ba kam trai halor kane ka kam thombor kaba la jia ha ka thaiñ Qala-e-Bakhtiar jong ka thaiñ Shathie ha ki bynta khappud jong ka nongbah Kabul.
Ki pulit ki la shu pyntip ba ia katei ka jingjia la leh da uwei u ‘riew kheiñduh uba la pynbthei bom ialade ha katei ka jaka paidbah bad kawei napdeng kitei kiba khlad, ka dei ka kynthei. Ia kitei kiba la mynsaw baroh la pynkit noh sha ki jaka sumar kiba don ha katei hi ka nongbah bad ka jingtohkit kan sa dang bteng ynda la ioh ban iakren bad kitei kiba mynsaw.
Hynrei la ong ba heh ka Taliban kiba dei khmih ia ka jinglong jingman hapoh ka ri Afghanistan, ki la pyntikna ia ka shongsuk-shongsaiñ bad khamtam eh ka jingshngaiñ ia ka jingim ki ‘riew paidbah naduh ba katei ka kynhun lehnoh Taliban hi ka la ioh ban knieh noh ia ka bor synshar ha katei ka ri ha u snem 2021.
Kumta la ong ruh ba naduh ba ka Taliban ka la synshar hi da lade hapoh Afghanistan, kiba bun ki kam thombor jong ki lehnoh ki la duna shibun eh bad bun na ki kynhun lehnoh barit-baria kim nud shuh ban leit pynthut ne leit thombor ha Taliban.
