Shillong, Nailur 04
U Sachin Khilari u la khur ia ka takma rupa ha ka jingiakop kawang shot put F46 final jong ki shynrang da kaba u la lah ban kawang haduh 16.32m ha ka Paris Paralympics 2024 ha ka sngi Balang.
Une u rangialehkai jong ka ri u la hadien ia u rangialehkai uba na Canada u Greg Stewart uba la lah ban kawang ha ki 16.38, kaba long ka aiom kaba bha eh ia u.
Lyngba kane ka takma ka la pynlong ïa ka India ban kynjoh sha ki 21 tylli ki jinglah ban khur takma, kaba kham bha ban ïa kaba long ha ka Tokyo Para Games. Mynta ka India ka don ha ka kyrdan kaba 19 ha ka miej jong ka jingïoh khur takma da kaba kamai lai tylli ki takma ksiar, 8 tylli ki takma rupa bad 10 tylli ki takma rnong.
Ki la don sa arngut ki nongïalehkai ka India kiba la ïalehkai ha katei ka jingïalehkai – u Mohd Yasser bad u Rohit Kumar. U Yasser u la wan ha ka kyrdan kaba phra da kaba kawang haduh 14.21m, katba u Rohit u la wan ha ka kyrdan kaba khyndai da kaba kawang ha ki 14.10m.
“Nga la kwah ban ïoh ïa ka takma ksiar, hynrei kam shym la urlong. Ka dei ka jingjngai kaba bha tam jong nga hynrei ngam da sngewhun haduh katta katta. Nga sngew ba nga lah ban leh kham bha. Kam dei ka sngi jong nga,” la pynpaw u Khilari hadien ba u la ïoh khur ïa ka takma rupa.
“Ka la long ka jingïakhun kaba eh bha bad u Greg Stewart u dei u nongïalehkai uba tbit bha. Nga la leh ïa ki jingbakla kiba rit ha ka buit jong nga. Ngan sa trei shitom shuh shuh bad nga kyrmen ban jop ïa u ha kawei pat ka por ka ban wan.”
U Khilari uba la ïoh ïa ka degree ha ka Mechanical Engineering, u la lah ban khur ïa ka takma ksiar ha ka Asian Para Games kaba la long ha u snem ba la dep ha China, u la don ka jingduna ha ka kti kadiang.
U Khilari, uba wan na kawei ka longïing ha ka kam rep kam riang ha ka shnong Karagani, ha ka distrik Sangli jong ka Maharashtra, u la ïakynduh ïa ka jingjia aksiden ha ki por ba u dangleit skul. Ka jingmynsaw ka la ktah ïa ka tyrpeng jong u bad ka jingduna ha ki shyieng. Wat hadien ba la shah sumar bunsien, ka kti jong u kam shym la koit satia. U la duh nohg ïa la ka kmie ha ka por ba u dang rit.
Hapdeng kine ki jingshah pynphaidien baroh, u la shim bynta ha ka javelin ha ka por ba u dangpule ban long engineer. Ka jingmynsaw ha ka tyrpeng ha ka por ba ïalehkai ka la pynlong ïa u ban kylla noh sha ka shot put.
U Khilari u la sdang ban paw ha kane ka jingïalehkai ha u snem 2015 bad hadien u la ïakynduh ia u coach ba pawnam u Satayanarayana uba la kyrshan ïa u ban nang pynbha ïa ka jingialehkai jong u.
U la trei ruh kum u nonghikai ba jngohkai ha ki jaka pule bapher bapher, da kaba ïarap ïa ki samla pule ha ka jingpynkhreh eksamin jong ki ha ka UPSC bad ka Maharashtra Public Service.
