Shillong, Nailur 04
Ka kynhun ïalehkai jong ka Myngken Christian HSS ka la lah ban pynthikna ban jam sha ka quarter final ha ka lympung ïalehkai 63rd Subroto Cup International Football Tournament, hadien ba ka la lah ban pynliem noh ïa ka Bihar da 5-0 kol ha ka sngi Balang ha ka nongbah Delhi.
Kane ka la wan urlong lyngba u Bannganson Nongphlang bad u Mebanlamlynti kiba la ïoh ban thep mar ar kol bad ïa kawei la pynbud da u Pynshai na ka bynta ban pynlong ïa ka Meghalaya ban bat ïa ka kyrdan ba hakhlieh da kaba kamai 9 point na ki lai sien ïakhun jong ka Group-F.
Ha kane ka jingïalehkai kaba khatduh ki khynnah ïalehkai ka Myngken ki la pyrshang ban ïakhun tyngeh naduh kaba sdang ha kaba ka la ïoh ban pynkhih jar nyngkong eh lyngba u Bannganson ha ka minit kaba 13.
Hadien shiteng kynta ka Myngken ka la ïoh ban pynbud biang sa ar kol lyngba u Mebanlamlynti ha ka minit kaba 32 bad 35. Haswa ban kut ka jingïalehkai jong ka kylla step katei ka kynhun ïalehkai kaba na Bhoirymbong ka la ïoh ban thep biang ïa ka kol kaba saw lyngba u Bannganson ha ka minit kaba 45 na ka bynta ban tam da 4-0 kol.
Hadien katto katne por ba la bteng biang ïa ka jingïakhun jong ka kylla miet, ka Myngken ka la ïoh biang ban thep sa shi kol lyngba u Pynshai ha ka minit kaba 56. Haduh kaba kut ka jingïalehkai ki khynnah ïalehkai kim shym la lah ban pynphai wat tang shi kol bad ha kaba kut ka la mad ïa ka jingshah rem.
Lyngba kane ka jingjop katei ka kynhun ïalehkai ka Jylla ka dangïai ap khmih lynti ïano ka kynhun ka ban ïakynduh ha ka quarter final bad shen na ka liang ki bor pynïaid kin sa pynbna bad kumjuh ïa ka sngi ba kin ïakhun.
Lah ban pynkynmaw ba ha ki jingïalehkai ba la lah, ka Myngken ka la lah ban pynliem ïa ka Dadra and Nagar Haveli and Daman and Diu (DD&DNH) haduh 23-0 kol bad da 1-0 kol pyrshah ïa ka Chandigarh da 1-0 kol.
