Jowai, Nailur 04
Ka Newhill SC bad ka Mulang Ïalong ki kynhun ki ban ïaknieh ïa ka nam lahduh ha ka lympung ïalehkai Third Division Football Tournament (4th Adelbert Laloo Memorial Trophy) la pyniaid da ka West Jaintia District Sports Association (WJDSA) ka ban long ha ka 7 tarik mynta u bnai ha Kiang Nangbah Stadium, Jowai.
Ha ka jingïakhun semi final kaba khatduh kaba la long ha ka sngi Balang, ka Mulang Ïalong ka la lah ban pynliem noh ïa ka Myrjai da 2-1 kol.
Ha kane ka jingïakhun baroh ar ki kynhun ki la ïakhaid mar 1-1 kol ha kaba u Dangaitlang Mulieh u la ïoh ban pynkhih jar nyngkong na ka bynta ka Mulang Ïalong ha ka minit kaba 22, hynrei u Jumonki Phawa u la lah ban pynïakhaid na ka bynta ban Myrjai ha ka minit kaba 70.
Hadien ba la rah noh ïa ka jingïakhun sha ka extra time ba ka Mulang Ïalong ka la ïoh ban thep biang sa shi kol lyngba u Samith Pale ha ka minit kaba 89 na ka pynlong ïa katei ka kynhun ban khur syndon ïa ka jingjop bad ban ïong rung sha ka final ha kane ka lympung.
Haba phai sha ka jingïakhun jong ka Second Division Football Tournament (7th Debo Shullai Memorial Trophy), ka Chilliangraij ka la jop da 4-2 kol ïa ka NSA.
Ïa ki kol jong ka Chilliangraij la thep da u Ïaki Lanong ha ka minit kaba 28, kumjuh u Hamewan Rngad u la the par kol ha ka minit kaba 30 & 67, bad ïa kawei pat la the da u Dathrang Ïakai (44). Na ka liang ka NSA ka la lah ban pynphai kylla lyngba u Gabrial Siangshai ha ka minit kaba 38 bad Richard Pasi ha ka minit kaba 76.
Ka jingïakhun jong ka Second Division ha ka sngi Palei kan long hapdeng ka Khliehmyntang Ïalong pyrshah ïa ka Shangpung Moosyiem ha ka por 12 baje mynsngi, katba ka Panaliar pyrshah ïa ka Lumpariat ha ka por 2 baje nohphai sngi.
