Shillong, Nailur 05
Ha ka sngi Palei, ki shipai ïada khappud Border Security Force (BSF) bad ki Border Guard Bangladesh (BGB) ki la pynlong ïa ka jingïalang ha ka kyrdan Sector Commander hajan Barsora Land Customs Station ha Bangladesh.
Ka thong jong kane ka jingïakynduh Iang hapdeng ki shipai BSF bad ki BGB ka long ban nang pynkhlaiñ ïa ka jingïadei hapdeng ki arliang mamla, ban pynthikna ïa ka jingïatreilang kaba janai, bad ruh ban ïakren halor ki mat kiba bun kiba ïadei bad ki khappud.
Ha kane ka jingïalang, na ka liang jong ki shipai BSF la lamkhmat da u Sh Manoj Kumar Barnwal, DIG ka Sector HQ BSF Shillong katba u Md. Saiful Islam Chowdhury uba dei u Deputy Director General ka Sector Commander ka BGB, Sylhet, Bangladesh u la lamkhmat ïa ka kynhun ki BGB.
Ha kane ka jingïalang, ki Commander na ki ar tylli ki kynhun kiba ïada ïa ki khappud, ki la ïoh ban ïatai bad ïakren sani halor bun ki mat kiba ïadei bad ki kam khappud kum ka Co-ordinated Border Management Plan bad kiwei kiwei ki kam ki ban pynmyntoi ïa baroh arliang.
Ha kaba kut jong kane ka jingialang, baroh ar liang mamla kila pynpaw ïa ka jingsngewkmen bad jingsngewhun ïa ki jingïakren kiba don jingmut bad kiba ïajan, kiba pynpaw ïa ka jingïadei paralok hapdeng ki ar tylli ki ri bad ha kaba kila kular ban pynroi ïa ka jinglong jingman ha khappud bad ban wanrah ïa ka shongsuk shongshngaiñ ha khappud.
Shuh shuh ha kaba kut syndon baroh ar liang da ka jingmut kaba bha ki la mynjur ban pynlong man ka por ïa kum kine ki jingïalang pynïajan ban pynthikna ba kan don ka jingïatreilang bad ka jingïaid beit ïaid ryntih ha ki jingpynïaid kam ha khappud.
