Shillong, Nailur 05
Ka Rangdajied United Football Club ha ka Sngi Palei ka la soi ïa ka soskular ban ïateh lok bad ka kawei na ki klob jong ka Indian Super League ka Bengaluru Football Club (BFC) na ka bynta ban saiñdur ïa ka lawei jong ki khynnah ïalehkai ka Jylla.
Ha kane ka sngi la ïadon lang u khlur ïalehkai barim ka Jylla bad uba long ruh u President jong ka Rangdajied United Sports Development Society u Bah Eugeneson Lyngdoh ryngkat u Darren Caldeira uba dei u Director of Football jong ka Bengaluru FC, kumjuh u rangïalehkai barim bad uba long mynta kum u coach u Aiborlang Khongjee, Bah Karsing Kurbah, ki dkhot jong kane ka klob, ki kmie ki kpa lem bad ki khynnah ïalehkai shynrang bad kynthei.
Ka jingthmu jong kane ka jingïateh lok ka long ba ki khynnah ïalehkai kiba don hapoh ka shlem ai jinghikai jong ka Rangdajied United kin ïoh ka lad ban leit shah hikai pyntbit bad ruh ban ïoh ïa ka lad ban ïalehkai na ka Bengaluru ha ka Karnataka League. Ha kajuh ka por ki coach jong ka Rangdajied kin ïoh ka jingshah hikai ha ka Bengaluru ïa ki buit kiba thymmai khnang ban saiñdur ïa ka lawei jong ki khynnah ïalehkai shynrang bad kynthei kiba don ha kane ka Jylla.
“Kane ka jingïateh lok ka long ban plie lad ïa ki khynnah ïalehkai ka Rangdajied ba kin ïoh ka lad ban leit shah hikai pyntbit ha ka BFC. Ym tang ki khynnah ki ban ïoh ka lad, hynrei ngin ailad ruh ïa ki coach jong kane ka klob ba kin ïoh ka jingshah hikai la ka long ha ka dur ‘online ne offline mode’ khnang ba ki lah pat ban saiñdur ïa ka lawei jong ki khynnah ïalehkai shynrang ïalehkai,” la pynpaw u Caldeira haba ïakren bad ki nongthoh khubor.
Ha kawei pat liang u Bah Eugeneson u la pynpaw ba kane ka jingïateh lok ka long ban plie lad ïa ki khynnah ba kin long ki khlur ïalehkai kiba paw ha lawei ka ban wan. “Naduh ba ngi dang long tang kum ki rangïalehkai, ma nga bad u Aibor ngi don ïa ka jingangnud kumno ban saiñdur ïa lawei jong ki khynnah ïalehkai ka Jylla. Te kumta kane ka jingïateh lok ka long ban plie lad ïa ki khynnah ïalehkai jong ngi ba kin ïoh ka jingshah hikai ha ka Bengaluru khnang ba kin long kiba kynsai ha lawei ka ban wan.”
“Ngi sngewthuh ba kum ka klob ngi dang duna ha baroh ki liang la ka long ha ka liang ka jingbei tyngka kumjuh ha ka jingsiew ïa ki rangïalehkai, ki jaka ai jinghikai bad ruh ngim pat lah ban kiew shaduh ka kyrdan ïalehkai I-League, hynrei ngi don pat ka jingthrang bad ka jingangnud ban plie lad ïa ki khynnah kiba don ïa ki sap ïalehkai ba kyrpang ba kin ïoh rung sha ki klob kiba paw jong ka ri bad ba kata ka sap ka jong ki kan ym long kaba lehnohei,” u la bynrap.
U Caldeira u la ong, “Kum ki kmie ki kpa kim dei ban don ïa ka mynsiem sngew tmang haba ki khun ki don jngai na la ïing namar haba ki don shabar ki ïoh ka jingshah hikai kaba paka ka ban plie lad pat ïa ki ba kin long ki khlur ïalehkai kiba paw ha lawei ka ban wan.”
Wat la kane ka jingïateh lok ka long tang na ka bynta lai snem, hynrei ka Bengaluru ka don ïa ka jingthmu ban ïai bteng ka jingïadei kaba jan bad ka Rangdajied khnang ban sei ïa ki khynnah ïalehkai kiba kynsai kiba don hapoh ka Jylla.
