Shillong, Nailur 05
Ka samla Rimika Dkhar kaba dang pule Bachelor of Science Third Semester ha Kiang Nangbah College, Jowai ka la ïathuh ba ka jingjubab jong ka, “it’s a secret” ka dei ba ka sngewthuh bakla namar ba ka dang mut ba ka nongbishar ka kwah ban ïakren shwa ba kan buh jingkylli ha jingïakop ‘thei bhabriew Miss Meghalaya 2024 hynrei kam poi pyrkhat ba kato kaba ka kren ïa ka, ka la dei ka jingkylli.
Katkum ka jingsaphriang ha rynsan social media, ka nongbishar ka la buh jingkylli, “I really like your gown so I just want to know, who is fashion icon and why?” Ka Rimika ka la jubab “it’s a secret”. Nangta ka nongbishar ka la ong biang, can you tell me, bad ka Rimika ka la jubab ‘No’ hynrei ka nongbishar ka khlem kylli shuh.
Wat la kane ka dur-khih ka la saphriang ha social media hynrei ka Rimika Dkhar ka khlem don ka jingsngewlehraiñ hynrei ka sngewkmen haba ka la shah jied ban ïakhun ha ka final jong katei ka jingïakop kaba dang shu dep shen ha Lariti Mawkasiang, New Shillong.
Ban tip kham bniah ïa ka jingsaphriang katei ka dur-khih, U Nongsaiñ Hima u la leit ban ïakynduh kyrpang bad ka Rimika Dkhar.
Ka Rimika Dkhar ka la ïathuh ba mynshem snem ka la leit ban shimbynta tangba ka khlem jop bad mynta u snem ka la shimbynta biang hynrei watla ka bakla pynban ka la ïoh lad ban rung sa ha final round.
Ka Rimika ka dei ruh ka puron jong ka phlim Pnar ka Johkhe.com kaba dang shu pyllait mynshem snem ha Bijou Cinema Shillong bad mynta ka thrang ban ak sa ki phlim Khasi ba la pynmih na Shillong.
Ka la ïathuh ba watla ka dang pule hynrei ka thrang ban long kum ka ‘thei bhabriew bad thrang ban long kum ka puron ha ki phlim Khasi.
