Shillong, Nailur 05
U Myntri Rangbah ka Jylla, u Conrad K Sangma u la ong ba ka jingpynbeit pud hapdeng ka Meghalaya bad Assam ka shu kham jyrwit-jyrwat ha kane ka wat ba-ar namar ka jinglong jong ki jaka bad ka jingïakren ban lah ban pynbeit ka dang bteng ha kaba ka jingïakynduh hapdeng ki ar Myntri Rangbah ka lah ban don biang ha u Risaw.
Ïa kane la pynpaw da u Myntri Rangbah haba ki nongthoh khubor ki buh jingkylli halor ka jingbym lah ban ïaid shaphrang ka jingïakren pynbeit pud ha ka wat ba-ar ha ki hynriew tylli ki jaka kiba dang dei ban pynbeit pud.
U Conrad u la ong ba ka Sorkar ka don ïa ka jingthrang ban pynbeit pud kumba la leh ha ka wat ba nyngkong, hynrei ha ki hynriew tylli ki jaka kiba dang dei ban pyndep ha kane ka wat ba-ar ban pynbeit pud ka shu kham jyrwit-jyrwat namar ka jinglong ki jaka khamtam kum ka Langpih, Psiar-Khanduli, Block-I bad Block-II.
Haba kylli lano ka jingïakynduh hapdeng ki ar Myntri Rangbah kan long biang, u Conrad u la ong ba la antad ba la kumno-kumno ka jingïakynduh ki ar Myntri Rangbah ka Meghalaya bad Assam ka lah ban long ha u Risaw mynta u snem.
U la ong ba dang shen ha kawei na ki jingïakynduh, u la ïakren bad Myntri Rangbah ka Assam u Himanta Biswa Sarma ha kaba la ïoh ban pynkynmaw markylliang halor ka jingdonkam ban ïakynduh biang na ka bynta ban ïakren ïa ka mat pynbeit pud.
Kum ban pynkynmaw, ki hynriew tylli ki jaka kiba la dep pynbeit ha ka wat ba nyngkong ki kynthup ïa ka Tarabari, Gizang, Fahala, Baklapara, Khanapara (Pilingkata) bad Ratachera.
Kine ki jaka kiba la dep pynbeit ha ka wat ba nyngkong ki hap ha khappud jong ka Kamrup district bad Cachar district ka Assam bad ha West Khasi Hills, Ri-Bhoi bad East Jaiñtia Hills district ka Meghalaya.
