Shillong, Nailur 05
U Myntri Rangbah ka Jylla u Conrad K Sangma u la pyllait paidbah ïa ka prokram kaba la tip kum ka ‘Chief Minister’s Initiative to Maximise Pass Achievement and Classroom Triumph’ (CM-IMPACT) ha ka jingrakhe ïa ka sngi ba kyrpang ki nonghikai ne ka Teacher’s Day kaba la pynlong ha ka sngi Palei ha U Soso Tham Auditorium, Shillong ha ryngkat ka jingïadon lang u Myntri ka tnat Pule Puthi u Rakkam A Sangma lem bad ki heh ophisar.
Ka jingpyllait ïa kane ka prokram da u Myntri Rangbah ka long ban weng ïa ka jingduna ki pass percentage jong ki khynnah skul ha ki eksamin Secondary School Leaving Certificate (SSLC) jong ka jylla Meghalaya. Nalor kane, ka jingthmu jong ka CM-IMPACT ka long ba kan ai ka jingkyrshan kaba pura ïa ki khynnah skul, ki nonghikai, ki skul, ki kmie ki kpa, bad ki distrik ba kin lah ban ïoh ïa ka risol kaba bha ha ka eksam SSLC.
Ki bynta ba kongsan jong ka CM-IMPACT ka kynthup ïa ka jingsam ei ïa ki guidebook ïa ki khynnah skul, ka professional development support (jingai jinghikai) ïa ki Nonghikai, ki additional guidebook ïa ki nonghikai, ban ai jingïarap ïa ki skul kiba duna duh kiba pass, ka jingpynïadon bynta ki Kmie Kpa bad ka jingpeit bniah ha ki kyrdan ki District.
Kum shibynta jong ka prokram, yn sam ei ïa ki guidebook sha baroh ki nonghikai jong ki klas 10, kampher la ki dei na ki skul shimet ne ki skul Sorkar.
Nalor kane, u Myntri Rangbah ka Jylla bad ki riew pawkhmat ki la pyllait paidbah ruh ïa ka Curio Bee’s Learning Box, ka Teaching Learning Material ban kyntiew ïa ka jingnang jingstad ka sap hikai ha ka kheiñ jingkheiñ (Foundational Literacy bad Numeracy) na ka bynta ki klas Nursery haduh 3, kiba ha ka rta naduh 3-9 snem bad la pyllait ruh ïa ka Science Discovery Kit, kaba long ka Experiential Science Kit na ka bynta ki samla kiba shna jingshna hi naduh klas 6 haduh 8. Ha kane ka sngi la pyllait ruh ïa ki kot lyngkdop jong ka SSA/DERT bad u PM POSHAN.
Haba ai jingkren ha kane ka sngi, u Myntri Rangbah haba pynpaw ïa ka jingsngewnguh bad ka jingburom ïa ki nonghikai ka jylla u la ong, “Ngi don hangne ban burom ïa phi bad ai khublei ïa ka jingaiti ba khraw jong phi, ka jingaiti bad ka jingnoh synñiang kaba khraw kaba phi ai ban pynthikna ba ka lawei jong ka ki khun jong ngi bad ka jylla ka long kaba shngaiñ bad kaba shai.”
U la ong ruh ba ka donkam ban don ka jingïakhun kaba bha bad kaba koit ba khiah hapdeng ki skul ha ki kyrdan district. “Ki skul kiba pynshong nongrim ha ki katto katne ki kyndon bad ym tang ha ki jingmih lah ban ai khusnam bad ki lah ha kajuh ka por ban ïasam ïa ki rukom treikam ba bha tam jong ki bad kiwei pat ki skul da kaba thaw ïa ka jinglong kaba bha ha kaba ki kyrshan iwei ïa iwei pat.”
Ha kane ka sngi, u Myntri Rangbah, ryngkat u Myntri ka tnat Pule Puthi lem bad kiwei kila ïoh ban sam ruh ïa ka State Award 2024 sha ki Nonghikai. Haduh 14 ngut ki khynnah na ki District bapher bapher kila shah pynkup burom bad ïoh khusnam ha kane ka sngi.
Hapoh ka Special Award 2024, ka District Schol Education Officer ka East Khasi Hills kala ai khusnam ïa ka Kong Cathrene Nongrum, Assistant Teacher, Schoof & Centre for the Hearing Handicapped Children, Shillong.
La pynphuh pynphieng ia kane ka jingrakhe da ki jingrwai bad ki jingshad na ki khynnah jong ki skul bapher bapher bad kiwei kiwei ki jingpyn byrngia.
