Shillong, Nailur 05
Ka Lumparing SC bad ka Mawkriah West SC ki la jop ha ka lympung ïalehkai Third Division Football League 2024 ba la pynïaid da ka Shillong Sports Association ha ka Sngi Palei.
Ha kane ka jingïakhun kaba la long ha SSA Stadium Polo, ka Lumparing ka la lah ban pynliem noh ïa ka Umlyngka SC bad kane ka wan urlong lyngba u Rionald Lyngshiang, Wanshan Nongkhlaw bad u Riskhem Syiem.
Naduh kaba sdang ka jingïalehkai ki rangïalehkai ka Lumparing ki la lah ban ïakhun tyngeh ha kaba u Rionald u la ïoh ban pynkhih jar nyngkong eh ha ka minit kaba 18 na ka bynta ban tam shi kol ha ka kylla step.
Hadien katto katne por ka Lumparing ka la thep biang ïa ka kol kaba ar lyngba u Wanshan ha ka minit kaba 60. Kane ka kynhun ka la thep biang ïa ka kol kaba khatduh pyngba u Riskhem ha ka minit kaba 90+1. Haduh kaba kut ka jingïalehkai ka Umlyngka kam shym la lah ban pynphai bad ka la mad ïa ka jingshah rem.
Haba phai sha kawei pat ka jingïakhun kaba ar, ka Mawkriah West SC ka la pynliem noh ïa ka Lawmali SC da 2-1 kol.
Kane ka nam jop ka la wan urlong lyngba u Honour Nongbri uba la ïoh ban thep ar kol na ka bynta ka Mawkriah ha ka minit kaba 57 & 90. Katba na ka liang ka Lawmali ka la pynphai kylla shi kol lyngba ka penalty ba la shut da u Richmond Buam ha ka minit kaba 39.
Kane ka lympung kan bteng biang ha ka sngi Thohdieng ha kaba Lumdiengjri SC kan ïakhun pyrshah ïa ka Gorkha Association ha ka por 12:30, katba ka Maw-pat SC ïa ka Krang SC ha ka por 3:30 janmiet.
