Shillong, Nailur 05
U Bah Everlasting Pyngrope uba dei u Principal jong ka Mynken Christian Higher Secondary School, Ri Bhoi district, u la wanrah burom ïa ka skul bad ka jylla baroh kawei da kaba shah pynkup burom da ka khusnam National Teachers’ Award ha ka sngi Palei ha ka President ka ri, ka Droupadi Murmu ha ka jingïalang rakhe ïa ka sngi ki Nonghikai kaba la long ha New Delhi.
U Bah Everlasting u la long uwei napdeng ki 50 ngut ki nonghikai napoh ka Ri India uba la shah pynkup burom da katei ka khusnam.
Ka jingïoh khusnam u Bah Everlasting ka long halor ki jingnoh synñiang jong u sha ka pule puthi bad ka jingtei ïa ka ri bad ban ai jingkyrshan kyrpang ïa ki khynnah kiba donkam ïa ka jinghikai kaba kyrpang.
Ka skul Mynken Christian Higher Secondary School kala pyndonkam ïa ka ICT lyngba ki kor Computer bad ka Smart Class ban pynroi ïa ka jingpule lyngba ki kor technology. U Principal jong kane ka skul u la trei shitom na ka bynta ka jingmyntoi jong ki khynnah skul ka thaiñ, khamtam eh na ka bynta ki khynnah kiba wan na ki longïing ba duk bad ki bym lah shuh ban bteng ïa ka jingpule.
Ka President ka Ri haba kren ha ka jingïalang pynkup burom ïa ki Nonghikai, ka la ong “Ki nonghikai ki hap pynkhreh ïa ki briew jong ka ri kiba don ka jingnang jingstad bad kiba don ka jingsngewlem, kiba shai bad kiba kloi ban thaw ïa ki lad lajong.”
Ka la ong ba ka jingïaid shaphrang ha ka jingim ka dei ka jingjop, hynrei ka jingmut shisha jong ka jingim ka shong ha ka jingtrei na ka bynta ka bha ka miat jong kiwei. “Baroh ngi dei ban don ka jingsngewlem. Ki kam jong ngi ki dei ban long kiba bha. Ka jingim kaba jop ka don ha ka jingim kaba don jingmut. Ka jinghikai ïa kine baroh ia ki khynnah ka dei ka kamram jong ki nonghikai,” ka la ong.
Ka President ka la ong ba ki nonghikai ki don ka bynta kaba khraw tam ha ka jingjop jong kano kano ka rukom ai jinghikai. Ka jinglong nonghikai kam dei tang ka kam, ka dei ka kam kaba kyntang na ka bynta ka jingkiew shaphrang jong ki briew. Lada u khynnah um lah ban leh bha, ka dei ha kane ka por ba ki nonghikai bad ka rukom ai jinghikai ki don ka jingbahkhlieh kaba kham jur. Ka la ong ba bun sien, ki nonghikai ki kham pylleit jingmut ha kito ki khynnah kiba leh bha ha ki eksam. Hynrei ka jingtbit ha ki jingpule ka dei tang kawei ka bynta jong ka jingtbit. U khynnah u lah ban don sap ha ka jingialehkai, lah ban don kiwei kiwei kiba tbit ha ka jinglong nongialam, kiwei pat ki sngewtynnad ia ki kam kiba wanrah ia ka bha ka miat jong ka imlang sahlang. Kumta, ki nonghikai ki dei ban nang ban ithuh ia ka sap kyrpang jong ki khynnah bad kyntiew ia kane, ka la ong.
